Ni sentido di seguridat, ni penshun obligatorio no mag bai pèrdí den huma pa kamuflá desorientashon di gobièrnu Pisas.
Willemstad — Miéntras MFK ta sklama pa medida kontra un èks-minister paso e la fortifiká Kustwacht, e mes MFK ta sinta mira su gobièrnu man riba barika ku falsifikadó di dokumento pa poderá di nos refineria. Miéntras ku nan tin nan penshun regla i asta a amplia espasio pa 2 kolaboradó mas biba riba stef di pueblo, e mes MFK ta krusa man ora e lei di penshun básiko obligatorio pasa su dilanti.
Awó, pa kulminá e komedia di mal gustu, Partido PIN a tende un parlamentario di MFK refutá e ponensia di un hues ku tin mas atrako relatá na glas skur. MFK ta kita e preokupashon ei foi su kurpa alehando ku no tin sifra, pa asina bagatelisá totalmente e sentido di insiguridat ku mas glas skur ta krea pa komunidat i outoridat. Tur esaki lubidando ku ora a pasa e lei di glas skur e mes frakshon di MFK no a presentá ningun, pero ningun sifra pa demonstra mas malesa di kueru òf daño na outo komo hustifikashon.
Opviamente e frakshon di MFK, pa kamuflá su desorientashon, ku su aktuashon inkonsistente ta trata di hinka konfushon largu largu den pueblo.
Representante di ken?
Ta parse ku mas barku su gobièrnu pega, mas e frakshon di MFK liderá pa sr. Thode ta lubidá su intenshon inisial pa kontrolá gobièrnu den dualismo. Komunidat ta mira kon un frakshon di nuebe poko poko a kambia di representante di pueblo pa defensor di asuntunan dudoso, inkluyendo falsifikashon. Riba dje awo ta bai asina leu di praktikamente bisa di no tin kunes tampoko ku e inseguridat ku pueblo ta sinti awó ku MFK a permití glas pretu.
Sinembargo loke mas ta duel Partido PIN ta ku e nuebe parlamentarionan guiá pa sr. Thode, na lugá di usa e tratamentu di e lei pa penshun básiko obligatorio komo un momento pa huntu logra algu na benefisio di tur trahadó, a atendé ku e inisiativa di lei ei na un forma distante, friu, kasi ku duele ku e proposishon ta eksistí mes.
Por otro
Partido PIN ya for di sèptèmber 2021 ta proponiendo pa pais bin huntu den un kumbre nashonal. No pa papia pero pa tuma desishon riba kambionan grandi pa nos pais.
Den e kuadro ei e asuntu di penshun básiko obligatorio ta un oportunidat pa demonstrá madures i hinka e balor di tur e biahenan di trabou den práktika. PIN ta sigur ku no ta muchu esfuerso pa tuma informashon for di Aruba kon nan lei di penshun obligatorio, bálido for di 2017, ta hinká den otro i ta funshoná.
Pueblo huntu ku Partido PIN ke sa di tur esnan enbolbí dikon esaki no ta un aserkamentu viabel!
