Mester inová pa Kòrsou bira mas asesibel pa personanan deshabilitá.

 

Willemstad – Den hopi famia na Kòrsou, tin hende ku kapasidat limitá pa motbu di un deshabilidat físiko i/o mental. Na 1992, Nashonnan Uní a ratifiká e fecha 3 di dezèmber komo Dia Internashonal di Persona Deshabilitá. Meta di e dia ta pa mundialmente promové komprondementu i aseptashon di suidadanonan ku un òf otro limitashon físiko o mental.

Tur dia personanan ku deshabilidat físiko o mental ta konfrontá vários reto. Debí na su limitashonnan ta difísil pa e persona por hasi òf kompletá sierto akshonnan. Den hopi kaso e aspekto di mobilidat ta un reto èkstra. Komo miembro di komunidat, nos tur tin un responsablidat pa karga i yuda aportá na konsientisá nos pais. Mester yega na un komunidat eduká riba tereno di asesibilidat i inklushon. Ta importante pa no solamente para ketu riba e dia di konsientisashon, pero pa krea maneho duradero i sostenibel pa yuda e grupo di enfoke emansipá.

 

Komo Gobièrnu nos mester reflekshoná na unda ta pará ku e leinan pa sostené e personanan ku un deshabilidat. Mester kuminsá wak i implementá tratadonan den un maneho di inklushon i formalisá leinan pa personanan ku deshablidat. Ademas konsientisá i interkambiá di forma inovativo pa krea mas posiblidat na personanan ku un deshabilidat. Ta importante pa tantu sektor públiko komo privá ta involukrá den un maneho di asesibilidat pa personanan ku deshabilidat. Esaki sigur ta kontribuí na satisfakshon i un sintimentu di speransa den nos pais.

Awe nos ta felisitá tur persona ku un deshabilidat pa ta un luchadó balente i ku kurashi pa enfrentá bida di un forma diferente.