Mervin Wyatt-Ras (AVP): Un hende muhe tambe por lidera digitalisacion y tecnologia innovativo 

En conexion cu Dia Internacional di Hende Muhe,  Parlamentario drs. Mervin Wyatt-Ras a felicita tur ser femenino ariba e dia aki y a trece su pensamentonan padilanti. Segun e parlamentario, aunke ta celebra e fecha aki desde aña 1911 ta necesario pa refleha y sigui tuma pasonan pa trece mas ekidad di genero.

Te ainda mundialmente y na Aruba hende muhe ta biba den circunstancianan menos faborabel y cu menos entrada financiero. Hende muhe te ainda ta ser discrimina, abusa, trafica y maltrata, sin cu e por pone un paro na esaki. E aumento di casonan di abuso y maltrato ta papia pa nan mes. Tin hasta otro formanan cu ta ser investiga cu ta grooming y sexting. Tur dia malhechornan ta inventa otro formanan di abuso y maltrato y den mayoria caso e victima ta e ser femenino. 

A pesar di e look deprimente aki tin diferente logronan den curso di añanan. 

Den añanan setenta a cambia ley pa haci posibel cu hende muhenan cu casa por keda traha den gobierno. Na aña 2003 a introduci e ley di stalking y e cambio di Codigo Penal pa hisa castigo y pone boet pa abusadonan di mucha/hende muhenan. A bin proteccion di hende muhe pa loke ta trata abuso sexual den matrimonio y pa esunnan cu ta haci trabou di prostitucion. Pornografia infantil a ser introduci den ley y a surgi proteccion pa esunnan special of cu tin un handicap. Na aña 2008 a cambia e Codigo Civil y e ley di SVB pa amplia e Verlof di Embaraso y Parto pa 12 siman, dunando e hende muhe mas tempo cu su baby prome y despues di parto, haciendo posibel alabes cu e mama trahado despues di parto por cria su baby cu lechi materno of por kolf lechi na pia di trabao. A introduci Vaderschapsverlof di 2 dia. Tambe a haci posibel pa e ser femenino por a haya mas pago ora di malesa.

Wyatt-Ras como iniciado di diferente di e leynan menciona ta remarca cu no tabata facil tampoco pa convence otronan pa sali na defensa di e ser femenino. P.e. e ley di zwangerschapsverlof a tuma 7 aña pa por haya e actornan, dunadonan di trabou y hasta coleganan politico riba mesun liña pa sostene e cambio di ley. Despues entre 2011-2014 a cambia leynan laboral cu ta beneficia tambe e ser femenino. A bira alabes posibel proteccion di hende muhe contra acoso sexual. Tambe grooming a ser agrega y hasta a lanta un Buro Vrouwenzaken, actualmente yama CEDEHM, dedica na empoderamento di e hende muhe. Sinembargo ainda falta mas logro. Aunke tin mas mucha muhe ta caba scol cu mucha homber toch e hende muhe ta ubica den e profesionnan menos paga y e hende muhe ta ser paga menos pa haci e mesun trabou cu e hende homber.

En bista cu e aña aki Nacionnan Uni a scoge como tema di enfoke “DigitALL: inovacion y technologia pa igualdad di genero, ta necesario adresa lo siguiente. 

Pa cu e tema aki tin cu señala cu nos pais ta avansando mas y mas riba e tereno digital y por nota cu hende muhenan ta mas y mas den posicionnan clave y tambe pues den posicionnan unda ta rekeri liderazgo den technologia. Wyatt-Ras ta menciona su mes como ehempel kende como presidente di Parlamento (2005-2009) tabatin e oportunidad pa lidera un era nobo den Parlamento cual ta digitalisacion di Parlamento. Kiermen cu nos como hende muhe tambe por lidera digitalisacion. Desde e fecha aki tur documento cu drenta parlamento ta ser digitalisa y registra den e sistema di  Decos. For di experiencia Wyatt-Ras por bisa cu e proceso di bay digital no ta uno facil. E ta rekeri un mindset diferente. Ta necesario pa prepara nos hobennan femenino pa cu e desaroyo aki y ekipa pa nan cu habilidadnan y ekiponan necesario. Tin cu tene cuenta alabes cu aspectonan social y crea balansa entre actividadnan digital, movecion sano y actividadnan social. No mag ta asina cu tin mucha ta keda atras. Nos muchanan desde chikito ta ser confronta cu internet y por maneha un iPhone of un celular. Sinembargo no tur mayor por permiti nan mes di cumpra un computer, laptop of iPad pa nan yiu. Aki ta necesario sosten na mayornan. Tin speransa pa e ser femenino y mas ekidad di genero en bista cu mas mucha muhe ta cabando scol y ta sigui studia. Ademas tin mas mucha muhe cu ta scoge careranan como IT, ingeniero, tecnico, etc. Banda di stimula escogencia riba e tereno aki ta necesario tambe pa traha na prevencion. Tin mas y mas casonan di bullying, violencia (sexual) via internet y manera ta e caso actualmente tin casonan di sexting. A bira mas facil pa predadonan drenta e mundo di hende muhenan y mucha muhenan pa medio digital. Nan ta manda mensahe pa despues inicia actonan (sexual) via telefon of internet pa despues extorsiona nan victima. Esakinan ta retonan pa e siguiente generacion cu ta haci educacion di nos futuro generacion mas complica ainda. Ta necesario pa tur mucha muhe haya oportunidad igual pa conoce medionan digital pa sin distincion di nan situacion economico nan lo por tin acceso na medionan digital y cu proteccion debido pa di e forma aki nan por participa na nos futuro digital y tecnologico innovativo.