MEP: Prijs halto di comestibles no ta pa culpa di gobierno sino di comercio mes

“Globalmente a conoce un inflacion basta fuerte riba tur nivel, causa pa e aumento di flete, aumento di petroleo, scarcedad di producto y guera na Ukraina, cu a destabilisa no solamente e region, pero e mundo henter. Esakinan a subi costo di energia, causa aumento den transporte global y mucho mas. Tambe mester remarca cu Astec ta aumenta su tarifanan tur aña considerablemente y esaki tambe ta un di e factornan grandi cu ta aumenta prijs di productonan. Aruba ta un pais importado y no por scapa e aumentonan aki sin mas”, asina Marco Berlis, parlamentario pa Fraccion di MEP ta informa. E politico ta lamenta cu pueblo tin un percepcion robes cu ora nan drenta supermercado y topa cu prijs caro, cu lo ta pa culpa di gobierno. El a reafirma cu mayoria producto no tin invoerrechten riba nan, pero ta e comerciantenan tin e tendencia di abusa den tempo di crisis.

Informacion di invoerrechten riba cuminda

E ta bon pa sa cu e gran mayoria di cuminda no tin invoerechten. Algun ehempel di esakinan ta: carni di baca, carni di porco, carni di cabrito of carne, pisca, lechi di baca, manteca, keshi, webo. Tur tipo di berdura fresco of congela tampoco conoce invoerrechten. Coffee, thee y aros. Asina tin masha hopi productonan mas cu ta liber di invoerrechten. Pueblo por lesa e documento completo di esaki riba e website di Douane. Den otro palabra, e ta bon pa pueblo sa, cu aumento di prijs no tin di haber cu gobierno pero directamente cu decision di e gremionan. Consumidonan mester ta consciente di e realidad cu tin un “mercado liber” y cu supermercado y tiendanan ta dicidi riba e prijs.

Canasta Basico

Conoce e productonan den canasta basico ta hopi importante. Esaki lo yuda e consumido di ta mas enfoca pa cumpra e productonan aki, sabiendo cu esakinan ta wordo regula pa gobierno. Di e forma aki famianan por rende nan placa mas y alimenta nan famia cu alimentonan bon pa e famia. Actualmente e canasta basico ta consisti di 1205 producto di diferente marca y contenido.

E canasta basico ta consisti di e siguiente productonan:

• Aros
• Babyfood
• Baby formula
• Koffie
• Thee
• Corn flour
• Coffee milk
• Lechi di polvo
• Azeta pa cushina
• Broccoli
• Spinazie
• Mixed vegetables frozen
• Boonchi cora, preto y lima seco
• Tuna fish den bleki
• Sardin den bleki
• Salmao den bleki
• All purpose flour
• Spaghetti
• Oatmeal
• UHT Milk
• Webo local
• Pan (kipashi) blanco

Na luna di mei di e aña aki a amplia e canasta basico cu algun producto mas;

• Galiña henter congela
• Cornflakes
• Pindakaas
• Fruta seco y congela
• Pampers

Control di e canasta basico y prijs di producto

Control di e canasta basico ta wordo haci diariamente pa e departamento di Asuntonan Economico. Tin un ekipo ta sali tur rond di Aruba pa sigura cu e prijsnan ta corecto. Sinembargo, e consumido por aporta conscientemente dor di check e prijsnan y denuncia e negoshinan ora cu nan ta surpasa e prijs stipula pa gobierno y asina yuda sigura cu e supermarketnan ta honra e prijsnan. Pa loke ta trata e productonan cu ta pafo di e canasta basico; compara prijs y cumpra unda ta cumbini. Informa otro riba plataforma social di esunnan cu ta abusa den tempo di crisis. Asina nos ta yuda otro shop “mas pa menos.”