MEP: Oposicion mester stop cu politica partidista

E parlamentarionan di MEP a reacciona riba e reunion di IPKO. A trata diferente topico, pero tambe a tuma oportunidad di bishita instancia. Un cos cu nan ta haya ta cu politica partidista di oposicion mester stop cu ne, pasobra durante IPKO ta representa un solo bandera.

Fraccion di MEP ta haciendo su maximo esfuerso na IPKO, unda cu nan a dicidi di haci mas tanto reunion y bishita posibel. Hendrik Tevreden di MEP a bishita Parnassia BAVO cu ta trata Geestelijk Gezondheidszorg (GGZ) Hulandes pa mira e cooperacion cu GGZ di Aruba. Tambe a bishita instancia di Cruyff Foundation p’e muchanan pa loke ta trata deporte. E parlamentario a indica cu tur esaki tabata inclui den e plataforma di IPKO pa asina e parlamentarionan di MEP probecha nan estadia na Hulanda y purba busca mas samenwerking pa Aruba.

Setty Christiaans-Yarzagaray di MEP, a indica cu nan a papia riba e lista di afspraak di e biaha anterior y con leu a yega nan. E parti cu tin dos Rijkswet riba mesa ta hopi importante, con el a yega na e vastlegging di dje y con e stand van zaken ta. MEP ta sinti manera nan cu falta informacion, pasobra e IPKO anterior nan a sali na mei faltando un siman pa entrega pregunta riba dos concepto di ley den reino. Te fecha di awe no a haya un contesta y ta pidiendo update riba ki posicion di proceso nan ta.

Alvin Molina di MEP a indica cu na mei nan tabata na Sint Maarten y a ripara e posicion dje coleganan na Hulanda. E pensamento di esunnan den Caribe pocopoco ta cambiando, pasobra nan mes ta admiti esey. Na comienso unda tabatin COHO, unda ta duna e sosten di likides, con nan tabata mira nan, exigi cierto cos, tabata basa riba un pensamento “cu kisas manera nan mes ta admiti no tabata realistico.” Durante e di dos dia di IPKO a papia riba e topico ey y nan no tabata compronde e situacion con Aruba ta pasando aden. Molina no ta haya cu esey ta algo straño pasobra “nos no ta compronde loke ta pasando akinan tampoco.”

Tevreden a sigui indica tur fraccion cu ta biaha mester compronde mas ainda cu ta biaha bou nomber di un bandera. Esey ta e bandera di pais Aruba y asina mes el a sinti den reunion, specialmente di Tripartiet e bay bin di politica partidario. E ta haya cu nan tabata na un nivel di politica nacional y esey ta significa cu nan mester representa bienestar comun di tur ciudadano y pais den su totalidad. Esey ta un punto di mehoracion y e lo trece esaki bek durante e reunion di Comision Fiho di Parlamento di biahe di IPKO riba e resultado cu nan por trece y logra.

El a ripara cu oposicion a bisa cu a trata aanwijzing, pero segun Tevreden, den tur reunion cu tabatin esey no tabata e caso. Den Tripartiet tanto Aruba, Corsou y Sint Maarten a papia con ta bay para mas hunto cu otro. Esaki ta pa tin continuacion den Tripartiet y no lag’e pa dos biaha pa aña, pero haci esey mas biaha y asina por debati cu e Hulandesnan den IPKO.

Christiaan-Yarzagaray a splica cu nan ta parti den grupo di cuater pa por tin miho discusion. Den e discusionnan aki ta percura pa pone nan puntonan riba mesa di a ambos banda. Asina ey por scucha di Hulanda con nan a yega na cierto punto den concepto di ley di COHO y RAFT. Pero pa Hulanda scucha e otro banda tambe. Molina a indica cu Hulanda ta mira cu Aruba ta eherciendo e tareanan prescribi den landspakket. No ta necesario pa pone extra presion pa Aruba y kita mas e autonomia.