MINISTERIO KONSERNÍ DESAROYO EKONÓMIKO
MEO RIBA KAMINDA PA LOGRA IMPLEMENTASHON DI KÒRSOU SU STRATEGIA NASHONAL DI EKSPORTASHON
PUBLIKÁ RIBA 26 ÒKTOBER 2022
Willemstad- Djárason 26 di òktober, Minister di Desaroyo Ekonómiko, sr Ruisandro Cijntje, a hasi entrega di un ehemplar di Kòrsou su Strategia Nashonal di Eksportashon (NES) na presidente di Banko Sentral di Kòrsou i St. Maarten, sr Richard Doornbosch. Ku esaki, Ministerio di Desaroyo Ekonómiko (MEO) huntu ku Minister Cijntje a duna inisio na un trayekto pa hasi entrega di e Strategia Nashonal di Eksportashon akí na diferente organisashon i partnernan stratégiko. E meta i enfoke di esaki ta, pa alkansá nanishinan tur den mesun direkshon pa por logra e vishon di e Strategia Nashonal di Eksportashon kual ta “Kòrsou, kaminda negoshinan ta prosperá”.
Durante sigur e último 30 añanan, e pilánan tradishonal di nos ekonomia a bin ta sirbi nos pais enormemente. Sinembargo, si nos ke mantené e prosperidat di Kòrsou, nos mester enfoká pa ekspandé i diversifiká e fuentenan di prosperidat. Mas kupo di trabou, kresementu di invershon i diversifikashon di nos sektor di eksportashon; kual na su turno lo reflehá bèk den e desaroyo di nos ekonomia. E Strategia Nashonal di Eksportashon (NES) ta e kontesta pa Kòrsou riba diferente di e retonan akí. E ta un plan di kambio integral dirigí riba pilánan nobo pa konstruí prosperidat; no dor di supstituí esnan eksistente, pero netamente komplementá esakinan pa asina nos por tin un fundeshi ekonómiko muchu mas sólido.
Despues di a finalisá e Strategia Nashonal di Ekpsortashon na Mei 2022, MEO su enfoke awor ta riba implementashon di esaki den e próksimo 5 añanan. Pa e implementashon akí ta un éksito, ta rekerí enbolbimentu di nos tur; for di ministerio i nv nan di Gobièrnu, pero tambe kompanianan den sektor privá. Kada Yu di Kòrsou ta hunga un ròl importante i por duna un kontribushon na e éksito di e Strategia Nashonal di Eksportashon.
Bo tambe ta interesá pa lesa e Strategia Nashonal di Eksportashon pa Kòrsou? Klek aki pa ‘download’ un vershon simplifiká di e NES.
Si bo ta deseá di lesa e dokumento kompletu, por manda un mail na vanessa.tore@gobiernu.cw pa bo por risibí esaki.
