Matrimonio homosexual: Ta na gobierno pa dicidi si ta bay Cassatie  

Diamars Hof (Tribunal di Husticia) a dicta un veredicto den e apelacion cu Gobierno di Aruba a entama despues cu Corte den Prome Instancia na Aruba a bay di acuerdo cu e demanda cu un pareha local di mesun sexo a entama pa discriminacion door di no por casa na Aruba. Hof a bay di acuerdo cu e decision inicial di  Corte den Prome Instancia cu ta indica cu e prohibicion di casa ta bay contra derecho di igualdad ancra den constitucion.

Mr. Desiree Croes ta un abogado di profesion, pero tambe un activista di e comunidad LGBTQ+ na Aruba. Como ex politico y parlamentario, el a boga semper pa matrimonio di mesun sexo y tabata un motor tras di e aprobacion di Geregistreerd Partnerschap, cual ta duna derecho igual na esun di un matrimonio heterosexual. A puntra Croes pa comparti su opinion como miembro di e comunidad LGBTQ+ y for di e angulo di ley. 

“E ta nifica masha hopi mes pa igualdad riba nos isla. E ta pa nos, di e comunidad LGBTQ, un logro, un triunfo masha masha grandi mes. E ta un dia pa celebra, pero atrobe ta un decision di Hof, cu ya caba tabatin den Prome Instancia y gobierno por hiba nos ainda Cassatie (Casacion). Esey lo nifica cu e lucha no ta termina te ora cu na Hoge Raad (Tribunal Supremo) dicidi,” asina Croes a cuminsa na bisa.

E ta kere, mirando e decision di Hof, cu e bala ta den skina di gobierno pasobra hues a mustra cu Aruba ta haciendo algo cu no ta corecto door di keda bringa un parti di comunidad y ta ora pa cuminsa berdaderamente haci diferencia y trata tur hende igual. Si Gabinete Wever-Croes II opta pa lag’e te aki, anto mester tuma e pasonan pa Parlamento cambia e ley y e ora ey si, segun e abogado, lo por ripara un cambio real y lihe.

“Nos no mester lubida cu nos prome articulo di nos constitucion ta bisa cu tur hende na Aruba mester wordo trata igual den situacionnan igual. No tin ningun diferencia entre ami of cualkier otro persona. P’esey ami lo mester haya trato igual di nos ley. Gobierno ta e ultimo cu por discrimina entre su ciudadano y esey ta pasando pa hopi aña caba,” asina Croes a bisa felicitando e fundacionnan cu a haci esaki posible, pero sigura tambe abogado Wever y e pareha cu tabatin e curashi di bringa pa su derecho dilant’i mesa berdad.

Loading…

Taking too long?

Reload document

|

Open in new tab

Download [45.65 MB]

Pa e relato completo, lesa edicion di TREMPAN