Mas mucha deteni: Aaron Rodrigues (18) ta sospechoso den e caso di asesinato na ex-Sand Bar

Aaron Rodrigues di 18 aña deteni pa asesinato na ex- Sandbar.

En conexion cu e caso di asesinato cu a tuma luga dia 4 december 2022 dilanti ex-Sandbar Recherche di Noord (DAR-2)a detene un hende homber Aaron Rodriguez, naci na Aruba di 18 aña.

Bou guia di Fiscal y acompaña pa Hues Comisario awe madruga a haci un entrada hudicial na un cas na Bushiri y aki a detene e di dos sospechoso den e caso di asesinato akiriba menciona.

Mirando e embergadura di e caso mester a haci uzo di Team di Aresto pa a aresta e sospechoso.
Pa Cuerpo Policial por resolve mas caso cooperacion y informacion di pueblo di Aruba ta hopi importante, p’esey nos ta pidi si bo tin cualkier informacion yama nos tiplijn: 11141. Nos ta garantisa cu bo ta keda anonimo.

TIRAMENTO NA SOUTH BEACH
Tabata den pleno marduga, alrededor di 1:25 am, memey di zonido duro entre Baru Lounge (ex-Sand Bar) na un banda y South Beach Centre na e otro banda, cu diripiente a scucha varios zonido di tiro for di un arma di candela. Y mesora a nota un homber benta na suela, memey di e caminda cu ta separa e un banda for di e otro, na e centro di entretenimento y “night life” di nos isla.
Su tras a sigui un imagen cu nos niun no kier den e area turistico di nos pais, esta un cantidad di polis, luz blauw y ambulance cu luz cora tur banda. E area cera y turistanan evacua for di e area pa nan mesun siguridad. A nota polisnan di RRT cu cara tapa, fuertemente arma na e sitio pa por haya informacion di tur testigo pa despues bay busca e sospechoso envolvi. Un berdadero zona di crimen, memey di nos zona turistico, na unda mayoria turista cu ta bishita nos isla ta hospeda of frecuenta.

POLIS: A TOPA UN SITUACION FO’I CONTROL
Di acuerdo cu e relato di Cuerpo Policial Aruba, na momento cu e prome patruya a yega na e sitio di crimen, a bin topa cu un situacion caotico y mester a pidi refuerso di mas patruya policial. A despacha patruya for di Oranjestad, for di Santa Cruz, for di Noord, hasta for di San Nicolas y sin lubida e Rapid Response Team (RRT), pa hunto duna nan colega un man, pa reestablece orden publico den e area turistico di nos pais. Un multitud grandi di hoben, hopi di nan droga y burachi, a aglomera rond di e victima y tabata stroba polis y ambulance pa por a actua. Mester a yega den cantidad di polis, pa por a hala nan for di e sitio y duna e paramediconan oportunidad pa purba reanima e victima y cera e area pa autoridad por cuminsa cu un investigacion, mientras recherchenan a cuminsa yega pa interoga e testigonan.

NA HOSPITAL: NO POR A HACI NADA MAS PA E VICTIMA
Na yegada di e ambulance na hospital, dokter no por a haci mucho mas. Pues, shete minuut despues, pa exactamente 1:36 am, dokter a constata morto di e victima, Anthony A. Carty, naci na Aruba y tabatin apenas 31 aña di edad. Un rato pasa algun famia y amigo a yega hospital y no kier a coopera cu siguridad, pa cual mester a bolbe manda algun patruya ey pa core cu tur hende cu no ta patient for di e sitio y splica nan cu ey no ta caminda pa busca problema, pasobra ta hende malo ta interna eyden.

INVESTIGACION A START MESORA
Asina cu polis na e sitio a constata cu aki ta trata di un caso di asesinato, a pidi pa manda recherche di Noord pa tuma e investigacion over. E departamento ta conta cu subinspector primera clase Carlos W. Muller na cabes. Hunto nan mester investiga, revisa tur imagen di camara di siguridad y scucha testigo pa por purba yega na e sospechoso principal den e di tres caso di asesinato pa e aña aki. No a tarda mucho cu, a base di informacion di testigo cu a haya na e sitio, cu a haci uzo di e ekipo di Rapid Response Team (RRT) pa detene un mucha kedando den un apartamento na Saliña,a Noord. Ey a confisca un auto marca Toyota modelo Vitz, pendiente di mas investigacion. Polis no por bisa ainda si e mucha homber aki di apenas 17 aña di edad, si e ta un sospechoso of si e ta “un persona di interes” den e caso aki. No ta descarta cu mas detencion lo cay awe ainda!
Anthony A. Carty, naci na Aruba y tabatin apenas 31 aña di edad. Su famia y amigonan ta yam’e “Juni Maton”

“MI NO TA RIA PA BO”
Testigo na e sitio a conta nos cu esaki no tabata un problema bieu cu a soluciona door di e tiramento awe marduga. Mas bien ta un discusion cu a start awe marduga den e club nocturno, a start un batimento di boca di un banda pa e otro. Dado momento e victima a bisa e sospechoso cu si e sigui, e lo seft’e cu bala. E victima ta un persona conoci pa ta cana arma y ta un cliente “vast” den KIA. Pero, e biaha aki e no a midi su contrincante mucho bon y e sospechoso a bir’e contest’e cu haci kico cu bo kier, “mi no ta ria pa bo”. Dado momento Juni a cana bay y ora e tabata memey caminda, e sospechoso a sali su tras, para e auto cu tabata biniendo y a tira su victima. Parce cu el a los por lo menos dos tiro. Despues cu e victima a cay na suela, e sospechoso a sali na careda bay y a perde den scuridad di anochi.