Mas medida: Gobierno ta aumenta impuesto riba sigaria

Na Ingles nan ta yama e tipo di impuesto asina “sin tax”. Den cierto forma, Gobierno ta “castiga” esunnan cu ta consumi loke ta malo pa salud, por ehempel, productonan di tabaco, alcohol y alimento cu hopi sucu. Minister di Finansa, Xiomara Maduro, a anuncia den Parlamento ayera cu desde 1 di januari lo aumenta accijns riba sigaria.

Segun e mandatario, cu a caba di anuncia aumento di salario minimo cu 4,3% otro aña, a bira anuncia mesora su tras cu sigaria lo bira hopi mas caro. Lo aumenta e impuesto riba importacion di sigaria for di Afl. 6,35 riba cada paki, te na Afl. 7,25 pa cada paki cu ta contene 20 sigaria los den dje. Ta un aumento di mas cu 12%.

Un bendedo di sigaria a bisa nos cu un carton di sigaria, pues cu ta contene 10 paki di sigaria, ta costa awendia 135 florin for di agencia. E bendedonan na agencia a avisa caba cu e carton lo subi te na mas o menos 150 florin pa un. No lubida cu separa di accijns, ta subi BBO tambe cu 1% mas desde otro aña.

Un paki di sigaria awo ta costa mas o menos Afl. 17,50. Y un sigaria los ta costa mas o menos 1 florin. Cu e aumento cu a anuncia ayera, ta premira cu e paki di sigaria lo por alcansa Afl. 20,00 debi na e BBO cumulativo, pasobra ta paga BBO dos biaha y gobierno ta cobra 36 cen na accijns riba cada sigaria cu bo huma.

Pa hustifica e aumento, Minister Xiomara Maduro a bisa su tras cu ta despues di 10 aña ta aumenta e impuesto aki. Tambe el a agrega acerca cu ta for di aña 2018 cu e organisacion internacional International Monetary Funds (IMF) a conseh’e pa e aumenta tur “sin tax” pa e por genera mas entrada den caha di gobierno.

Ironia ta cu Gabinete Wever-Croes ta scoge cua conseho di IMF pasobra algun otro ta pone un banda. Entre otro esun di baha gastonan di gobierno. E gabinete na mando otro aña lo hisa nan entrada drasticamente door di cobra comercio mas placa na impuesto, cobra turista hopi mas pa bin y pa hospeda na Aruba, ta hisa belasting riba sigaria, pero no ta baha gasto. Aki varios organisacion a bisa e gobierno na mando cu e aparato gubernamental ta mucho grandi y mescos nan gastonan.

A probecha pa corda publico cu Gabinete Wever-Croes a cambia e leynan di tabaco recientemente, den cual a stipula cu e edad pa cumpra sigaria den tienda ta 21 aña. Tambe cu a prohibi tur establecimento pa bende sigaria los. E cliente tin dos opcion ora di cumpra, sea ta cumpra un paki of un carton, pero nada di un sigaria los!