Mas fayo den construccion: Hospital bou awa atrobe

Diadomingo durante ora di mainta a surgi un incidente inespera di dramamento di awa den Wondpoli di Horacio Oduber Hospital. Door di e incidente aki Wondpoli lamentablemente a yena completamente cu awa. Di biaha a bati alarma y un team interno a lora manga y cuminsa cu e limpiesa di awa cu a core bastante y a causa basta daño. Mirando cu ta un departamento asina esencial pa sigui brinda nan servicio di biaha a traha riba un plan pa asina busca solucion pa pashent por sigui ricibi e cuido necesario desde mañan.

INFORMACION PA TUR PASHENT DI WONDPOLI

–          Na prome luga diadomingo merdia team di Wondpoli a yama pashent cu tin cita mañan pa asina informa nan di e incidente. Mañan nan lo sigui cu e pashentnan cu falta.

–          P’e casonan di emergencia a pone cla temporalmente un camber pa atende pashent na departamento di endoscopie cu ta den e mesun gang di Wondpoli riba dialuna y diamars si ta necesario.

–          Entre diadomingo y tambe dialuna lo muda Wondpoli completo pa su localidad anterior, esta den Medical Office Building (MOB) n’e parti dilanti di e edificio.

INFORMACION DEPARTAMENTO DI ADMISION

–          Departamento di Admision a muda diadomingo p’e prome piso di Medical Office Building (MOB) temporalmente pa asina Wondpoli por atende nan pashentnan na nan localidad anterior. 

Si tin cualkier pregunta pashentnan di Wondpoli por yama libremente dialuna entre 7am y 3pm na 527 4200 of 597 4405. Si tin cualkier pregunta pa departamento di Opname por yama na 5274000 y nan lo comunica bo persona cu e departamento concerni.

Hunta di Directiva y Management completo ta hopi orguyoso di con lihe tur cos a bay y ta desea di bisa danki na e team di Hospital, esta personal di Technische Dienst, Hoteldienst, Security di Cluster Facility cu di biaha a lora manga y yuda cu e limpiesa. Despues cu a bati alarma mas colega di HVT a bin yuda y tambe colega di Wondpoli, Opname, IT, Higiena y mas cu semper ta cla para pa yuda sin importa dia ni ora nan t’ey pa asina salvaguardia e cuido pa nos pashentnan. Boso ta keda demostra “time after time” cu team di HOH ta super!

E CONSTRUCCION

Despues cu Stichting Onroerend Goed Aruba (SOGA) a inverti riba 350 miyon florin den construccion di edificio nobo y renobacion di edificio existente, keto bay tin fayo cu ta stroba operacion di hospital y trankilidad di pashent. Ta parce cu e trabounan ta dal un paso padilanti y dos paso patras. E dramamento di awa di diadomingo a causa hopi daño na ekipo atrobe, locual sin duda lo desemboca den mas claim di banda di hospital pa SOGA, cu ta maneha pa AIB-Bank.