Mas esfuerso pa recauda fondo pa nos muchanan

John Fun, di Fundacion Ban Dun’un man pa Cria Nos Muchanan, a bisa di ta contento di conta cu e apoyo di GWL Foundation, unda cu e un parti di loke nan recuada dia 5 y 6 di december, ta pa nan fundacion pa asina sigui yuda mas mucha cu nan desayuno na scol. 

P’esaki, sigur nan ta masha gradicido. Cu e fondo recauda nan lo por sigui yuda mas mucha. 

Durante henter GWL Foundation ta activo den comunidad. Asina George Winterdaal, Presidente di GWL Foundation a cuminsa na bisa. 

Pa dia di 5 y 6 di december, nan lo tene e Cupcake di Speransa, cual normalmente nan ta tene riba Dia di San Valentin, pero e biaha aki lo ta un Sinterklaas Edition. Ta trahando riba e proyecto aki hunto cu Fundacion Ban Dun’un man pa Cria Nos Muchanan.

Pero prome cu esey, Winterdaal a splica cu den cuadro cu Dia di Mucha, cual ta dia 20 di november, nan lo tene un Feed the Kids Day. Riba e dia aki nan lo prepara mil pakete pa tur mucha di Aruba. E pakete ta consisti di pan cu hotdog cu nan juice. E evento lo ta di 10:00am te cu 2:00pm.

Dia 15 di december, e fundacion lo ta hunto cu e muchanan di Casa Cuna, Imeldahof y Bibito Pin, na un lunch di Pasco. 

Riba e dia aki lo hiba e muchanan pa un lunch special di Pasco na Alhambra Casino, unda cu lo tin musica di Pasco, Santa Claus tambe lo ta presente. Cada mucha lo ricibi un regalo tambe.

Por ultimo, e fundacion lo tene su di 21 edicion di Un man pa nos ruman, unda lo traha 50 pakete, dia 17 di december. Esaki ta specialmente pa e muchanan di menos recurso den nos comunidad.