Un di e promé kursistanan di IPE den agrikultura modèrno ku a perseverá i logra
MARSHAL DAMIANA PONÉ DEN LUS NA INISIO DI KURSO PA HARDINERO I HORTIKULTOR
Willemstad, 20 di Sèptèmber 2022 – Institute for Professional Excellence (IPE) a pone Marshal Damiana den lus na inisio di e kurso di Hardinero i Hortikultor, komo ehèmpel di un di su kursistanan ku a sigui un kurso di agrikultura modèrnu i ku a start su mes empresa ku éksito. Yüli último IPE i Hòfi Mango a firma un akuerdo pa kolaborá i huntu prepará i forma kunukeronan den teknologia modèrno di plantashon. E trabou tin futuro aden, i e 26 kursistanan ta sumamente motivá pa por desaroyá nan konosementu den Hòfi Mango. Durante 12 luna nan lo amplia nan konosementu i práktika tokante kultivo i hardineria, komposishon di suela, komersialisashon di e servisio ku nan mes lo ofresé den futuro i hopi mas. Pa duna inisio na e kurso a hiba palabra Minister enkargá ku Salubridat, Medio Ambiente i Naturalesa, dr. Dorothy Pietersz-Janga i Presidente di IPE Sr. Franklin Sluis.
E historia di Marshal Damiana ta unu ku ta yená ku inspirashon. Marshal Damiana i su kasá tabata traha pa refineria Isla, te ku ora nan i un gran kantidat di persona a pèrdè nan trabou. Huntu nan a kuminsá interesá nan mes den algu kompletamente otro, agrikultura. Asina, den aña 2020 Marshal tabata un di e promé kursistanan den e area di agrikultura modèrno. Awe nan tin nan propio negoshi D’ Farm, ku ta fruta di e konosementu atkerí durante di e kurso di IPE den kombinashon ku nan konfiansa i perseveransha pa logra ku nan negoshi. Komo muestro di apresio Minister Pietersz-Janga, kompañá pa Sr. Sluis i Sra. Mattheeuw-Ortela di IPE i Jandino Asporaat di Het Huis van Asporaat, a hasi entrega di un arte diseñá pa e artista lokal Giovanni Abath.
10 di e kursistanan lo haña e oportunidat pa haña trabou den Hòfi Mango unabes e kursistanan finalisá e preparashon eksitosamente. Banda di esaki ya tin otro kompanianan, por ehèmpel den hoteleria, ku a ekspresá interés den e profeshonalnan aki unabes nan kaba e kurso.
IPE i Hòfi Mango di e forma aki huntu ta kontribuí konkretamente na kuponan di trabou pa e kunukeronan ku ta dominá métodonan di plantashon modèrno. Un ‘spin-off effect’ importante ta ku nos ta stimulá ‘seguridat alimentisio’ riba nos isla i tambe redusí importashon di fruta i bèrdura for di eksterior.
