Marisol Tromp (MAS): Screening anual di minister por evita problema cu husticia

Diaranson mainta Prome Minister a presenta den Parlamento p’asina duna cuenta di su maneho den gobierno. Nos a combersa cu lider di fraccion di MAS, parlamentario drs. Marisol Tromp, kende a comenta cu nan a haya un amplio splicacion di un cantidad di departamento, aworaki hunto cu Prome Minister, splicando riba e landspakket di pais Aruba.

Tromp a haci hopi pregunta y un di nan ta kico ta e motibo cu ta mencionan hopi biaha cu nos aparato publico mester ta eficiente, mester ta mas chikito y na mes momento ta mira cu gobierno ta amplia su cantidad di departamento y sigur bao di e gobernacion aki, mientras cu ta bisa cu mester ta mas eficiente. Esey ta un di e preguntanan.

Tambe a puntra riba e parti di e cartera di e ministernan. Cada eleccion, e carteranan ta cambia, e combinacion di cartera ta cambia y tin un landspakket caminda cu tin un trabao cu ta tuma luga a termino largo, ki efecto esaki tin riba e cartera y nan escogencianan. Nan a contesta por ehempel cu pa e parti di eficiencia di e departamentonan, ta berdad cu tin diferente departamento cu ta coy parti di dje, lanta departamento nobo. Por mira esaki en particular den asunto social, caminda cu tabata un departamento grandi, cu tur cos bao dje, y den termino di varios aña, a bin e divicion, manera un departamento special pa hubentud, crisis plan, justice center, departamento pa mucha. Riba su mes e ta sirbi meta den comunidad pero na mes momento e departamento mes a keda bashi. Asina tin mas ehempel di esaki.

Por a mira cu tabatin recientemente cambio pa loke t’e ministerschapnan. Por a mira cu e ministernan no tey mas. No tin Glenbert Croes, ni Endy Croes. Sinembargo parlamento te cu awe no a ricibi ainda un landsbesluit cu ta defini ken ta bay tuma cua cartera over. Tromp tabatin den su man un landsbesluit di dia 11 di october, despues cu Glenbert Croes no t’ey mas y awo despues cu Endy Croes no tey mas como minister, Prome Minister a bisa cu el a tu a cierto cartera over di deporte y enseñansa fo’i dje, pero no a ricibi e Decreto Gubernamental. 

Pregunta tambe ta keda si no tin conflicto di interes, ya cu tin caso penal bao di e cartera aki cu ta toca familiar di e prome minister y e ta tuma e cartera over.

Segun Tromp, ora cu tin screening, cual ta parti  hopi importante pa ora cu bira minister, ta wak cu esey ta un di e aspectonan cu nan ta mira. Nan ta wak por ehempel si e hendenan rond, ta mira e parti financiero, nan ta wak e transaccionnan haci, nan ta mira e parti hudicial, diferente aspecto y mirando cu Secretario di Estado Szabo a saca pregunta caminda e ta bisa cu e kier bay monitor e parti aki den Caribe mas di cerca pa loke ta integridad y contra corupcion, por mira hustamente e tema aki t’e motibo pakico tempo cu a trata e ley di screening di minister, fraccion di MAS a pidi pa haci un screening cada aña riba e ministernan actual, p’asina ta sigur cu tur cos ta keda cana manera e tabata dia cu a nombra e minister. 

Ki mishi cu e ministernan ta ministeriabel riba cierto fecha y algun tempo despues nan ta hinca den caso penal cu por a evita si a pone screening cada aña. 

Pa mas detaye lesa TREMPAN.