Marisol Tromp (MAS): Minister tin cu duna contesta riba procedura di DPL y asunto social

Parlamento di Aruba a tene un reunion publico pa trata e topico di costo di bida cu a subi drasticamente. Fraccion di AVP a pidi e reunion aki desde aña pasa y te awo a bin trat’e.

drs. Marisol Tromp, parlamentario (MAS), a indica cu a haci pregunta na Minister di Asuntonan Social y Labor riba e preocupacionnan dirigi den comunidad. Un di e preocupacionnan ta entre esunnan di edad di 40 pa 50 aña cu ta bay solicita. E parlamentario a indica cu nan ta sinti cu nan ta discrimina a base di nan edad cu nan ta haya trabou y kico esey ta significa pa nan. Nan a pidi pa tin atencion riba e parti aki, pasobra tambe tin esunnan riba bijstand. Nan tin di bay inscribi na DPL pa despues por haya un bijstand. Hopi bes nan tampoco ta haya un trabou.

Problema di debe

Un otro punto cu e parlamentario a bay riba dje ta e problema di debe, unda cu hopi famia ta pasa aden, e zogenaamde schulden problematiek. Den pasado tabatin fundacion cu tabata yuda hende den e proceso aki pa sali fo’i debe. Basta aña pasa tabatin e fundacion Balansa Nobo cu tabata dedica na esaki, cu ta trata cu diferente instancia pa purba yuda e persona sali fo’i debe. Pero pa motibo cu nan no ta haya subsidio mas, nan no t’ey mas.

Tromp a puntra gobierno ki alivio, ki solucion, nan tin pa yuda ciudadano cu ta structuralmente den un forma problematico ta hinca den debe. Tur hende por tin debe, pero e ta bira un problema ora no por sali di dje mas.

Pensionado

E parlamentario a puntra riba e pensionadonan, pasobra hopi di nan ta sinti cu e placa no ta yega. Consecuentemente nan ta bay Departamento di Asuntonan Social pa pidi ayudo, pero nan no ta bin na remarca. Esaki ta debi cu nan tin pensioen y pasobra nan no por traha mas despues tampoco. Bijstand ta un ayudo temporal pa despues e persona por haya un trabou.

Pa mas lesa TREMPAN.COM.