Marisol Lopez Tromp (MAS): Presupuesto 2023 no ta conforme e conseho di CAft y Raad van Advies

Manera cu a splica na varios ocasion cu fraccion di MAS, y henter oposicion a manda un carta pa gobierno y pa Hulanda splicando no solamente e mal maneho, sino tambe e procedura con e Presupuesto 2023 a cana. E ta carece di un conseho di CAft y Raad van Advies cu ta hopi necesario, mirando e cambionan substancial cu gobierno a trece den dje. Ta referi aki entre otro na kita e BTW y bay pa e 1% di BBO desde januari 2023.

Esey ta algo cu tin consecuencia grandi y no ta wak esaki hinca den e presupuesto actual. Tampoco a inclui un nota di cambio for di cual por saca afo pa kico nan a hacie y kico ta e consecuencianan. A pesar cu diferente gremio y grupo den nos comunidad ta sclama y adverti riba tur e problemanan cu esaki lo por trece cu ne manera cu gobierno tin e prepara, asina mes no a haya ningun splicacion den parlamento te cu awe den forma oficial di e Minister di Finansas.

Tin un carta caminda cu fraccion di MAS a pidi un reunion publico cu Minister Xiomara Maduro. A pidi splicacion riba e decision abrupto di gobierno, caminda cu ta pidi pa desde januari 2023 e aumento den BBO belasting. Caminda ta pidi p’e bin splica den parlamento y duna e parlamentarionan chens pa haci pregunta den nomber di pueblo y haya contesta riba esaki.

Loke e ministernan ta bira haci, ta organisa cada bes e ruedanan di prensa den cuater muraya di cocolishi cu algun miembro di prensa selecta, y pueblo mes no ta yega na haya contesta riba su preocupacionnan. Consecuentemente e debatenan ta tuma luga riba Facebook y den e caso aki den un programa, y no den e sala di parlamento caminda e minister tin cu responsabilisa su mes pa su maneho y su decisionnan.

Tabatin carta cu a bay pa gobierno, caminda ta pidi pa CAft duna su conseho un bes mas pa e cambionan proponi di gobierno y tambe Raad van Advies, mirando cu esey ta loke e miembronan di parlamento mester haya for dje organonan independiente pa duna nan un bista riba kico tur ta e consecuencianan y kico tur mester tene cuenta cu ne.

Gobierno a bira di un forma cu bo no por confia, pasobra cada rato nan ta bin cu cambio abrupto cu no ta cuadra cu e palabracionnan haci, entre otro cu Hulanda. E reformanan cu nan ta keda hala pa futuro. Y bo ta wak hopi cla den e carta cu a haya como contesta cu e esencia ta cu nan ta percura pa pueblo paga mas, cierto belastingnan mas halto, prijsnan ta subi, pero e recortenan cu nan tin cu haci como gobierno no ta haciendo e como deber ser. Of si hacie mes no ta riba e parti di personal ta tin hopi aña ta warda nan pa haci e cambionan proponi den un rapport cu a sali te cu awe nada. Consecuentemente te cu awe e ambtenaarnan ta pagando e porcentahe fin di luna cu, ta yudando gobierno “cumpli” cu e palabracionnan. “E recorte no ta sali for di nan mes, sino for di bo cartera”.

Fraccion di MAS lo ta presente den nan oficina di fraccion haciendo nan trabou. Pero no ta participa di un procedura cu a bay completamente robes y no ta duna oido na nos peticion, mirando cu no tin respet pa oposicion cu ta forma e cantidad di votadonan di mas grandi den ultimo eleccion, nos a tuma e decision aki. Asina Parlamentario Marisol Lopez Tromp a finalisa bisando.