Marisol Lopez-Tromp (MAS): No por sigui pospone e reformanan cu mester bin

Lider di fraccion di MAS, drs. Marisol Lopez- Tromp tambe ta un di e parlamentarionan den e reunionnan di IPKO na Hulanda.

Un di e topiconan cu a haya mas atencion, tabata e Ley di Consenso, cual diferente parti di Reino ta pasando aden. E discusion ta si mester di un entidad manera COHO, pakico si of no, pa yega na reformanan pa nos paisnan.

Varios punto di bista a bin dilanti den e Comision di Trabou y manera ta conoci na Aruba caba, un mayoria di parlamento ta contra pa ehecuta e reformanan manera cu e ta cu e Ley di COHO. Tanto fraccion di MAS como di Accion21, a presenta nan punto di bista riba papel, cu ta importante pa tin un entidad pa sigura cu e reformanan lo tuma luga, na un forma duradero y structura.

Si esaki no ta tuma luga, ta haya loke ta pasando awo, caminda cu cierto decisionnan importante pa nos pais, palabra entre prome minister y Hulanda, for di dos aña pasa, ta keda posponenan. No solamente riba tereno di salubridad. Pero tambe cu e reformanan fiscal cu mester bin, cu e asunto di BTW y ta keda cu BBO.

MAS a pone den su programa cu e reformanan ta un parti esencial si kier bin cu cambio y e no tin nada di haber si kier ta popular of no, pero mester tuma nan pa bienestar di e pais. Pero den e debate a bin dilanti ta e forma den cual Hulanda lo kier ehecutanan, manera palabra cu e paisnan. No tur ora e ta bay facil y ta haya resistencia.

Pero no por sigui pospone e reformanan cu mester bin y manera cos ta na Aruba, unda cu ta para dilanti di un aanwijzing, cu claro, niun pais lo kier esey. Pero no ta asina sin mas esaki ta bin: ta pa falta di cumplimento di gobierno, di keda pospone loke mester wordo ehecuta. Door di haci esey, ta mas hende lo sufri. E cambionan cu mester bin, mester ta bon a termino largo pa nos pais.

Si tuma por ehempel, e consehonan Di CAft cu pa di cuanto biaha no ta cumpli cu nan. Esaki ta bin bek pa nos pais, ya cu ta mir’e como incumplimento di nos pais.

Pa hopi tabata sorpresa momento cu mr. Edgard Vrolijk, presidente di parlamento di Aruba a trece dilanti den un discurso den Eerste Kamer, unda e lo a insinua cu ta pidi un ‘kwijtschelding’ pero tambe un ‘gifte’ di parti Hulanda, pa locual ta e prestamonan cu Aruba a haya for di Hulanda tempo di pandemia.

Lopez-Tromp a indica ora di bin Hulanda, bo ta bin como delegacion di bo pais. Prome cu hiba un discurso cu puntonan asina, mester reuni cu e delegacion y yega na un acuerdo pa por trece e puntonan aki dilanti na nomber di e delegacion di Aruba. Kisas ta e punto di bista di MEP, pero mester a debati esaki prome cu trece esaki como idea di tur hende.