Marisol Lopez-Tromp (MAS): Gabinete Wever-Croes ta tapa mal maneho di su ministernan!

Manera ta conoci, ayera a tuma luga un encuentro den Parlamento di Aruba unda minister-president mr. Evelyn Wever-Croes a duna un presentacion riba e investigacion cu e departamentonan di gobierno a haci na Aruba Huis. Drs. Marisol Lopez-Tromp actualmente ta na Den Haag den cuadro di un invitacion cu el a ricibi pa Koninkrijksdag. Pa e motibo ey e no tabata presente durante e encuentro. 

Sinembargo, desde Den Haag, e lider di Fraccion di MAS a duna su punto di bista riba e reunion cu a tuma luga den sala di Parlamento. “Ta bon conoci cu Fraccion MAS a pidi pa e rapport aki fo’i basta luna caba”, asina e parlamentario a cuminsa bisando. El a continua bisando cu awo Aruba completo a haya sa cu e rapport tabata cla pero cu supuestamente minister-president kier a haci mas investigacion hunto cu Departamento di Recurso Humano. Aki ta caminda a constata cu tabatin violacion di diferente aspecto di ley di contabilidad, tambe a sali afo cu tabatin desviamento di e procedura di destaho publico. 

Ley pa un ley pa tur?

“A constata un cantidad di asunto cu normalmente…bou cualkier circunstancia…lo a entrega keho sea na Landsrecherche of na Ministerio Publico”, segun Lopez-Tromp. Mirando ful e modus operandi con minister-president a atende cu e caso aki, por conclui, cu tur caso den futuro caminda sea un politico of ambtenaar ta envolvi den un caso di fraude of ta haci mal uzo di su funcion, e lo haya chens pa paga bek. Pues si ta ley pa un ta ley pa tur…esaki lo bira e modus operandi awo?

E pregunta di e parlamentario y alabes lider di Fraccion di MAS ta: Tur ta haya un onderzoek administrativo y despues ta haya e oportunidad pa paga bek? Y despues lo mira e aspectonan penal?. Lopez-Tromp a reitera cu “cu mi sa, tur ambtenaar cu a haya nan mes den tipo di caso asina a haya nan mes cu caso penal. Nan no a haya chens pa regla ningun asunto”. 

Mal record pa Gabinete Wever-Croes 

E manera con a atende cu e caso specifico aki di ex-Minister Plenipotenciario Guillfred Besaril, sigur ta lanta hopi pregunta. Na mes momento, Marisol Lopez-Tromp, a bisa tambe cu awo esaki a para un modus operandi di Gabinete Wever-Croes. A wak esaki caba den e caso caminda a bay Parlamento pa exonera diferente minister, por ehempel exonera Minister Glenbert Croes cu e casonan di FASE, caminda tambe tabatin rapport di CAD. 

Tambe a nota cu Minister Xiomara Maduro, den su caso tabata cu overbruggingsuitkering, ora cu el a paga diferente suma cu no tabata indica den ley. Awo ta wak e situacion ta sosode cu e caso di Aruba Huis y no esey so sino tambe den caso di ex-minister di MEP, awo ta purbando di exonera algo cu a sosode mas cu 10 aña pasa. 

Siman pasa Parlamento di Aruba a ricibi un proyecto di ley pa apodera Minister di Turismo y Salubridad Publico, Dangui Oduber, pa e firma un acuerdo pafo di Corte pa soluciona un disputa cu a sugri desde aña 2009 na momento cu Pais Aruba a termina e contrato cu Lee Tofanelli and Associates Inc., cu durante Gabinete Oduber IV (MEP) tabata encarga cu organisacion di e ‘Aruba Music Festival’. Podise hopi lo no corda of lo no ta realisa e embergadura di e ley aki. Pero basicamente e ley aki ta pa tapa mal maneho di e mesun Gabinete Oduber IV despues di 13 aña ta exonera ex-Minister Edison Briesen, actual consehero di Gobierno, di tur reponsabilidad y culpa pa a firma un contrato contra Ley di Contabilidad.