Marisol Lopez-Tromp (MAS): Educacion a resalta como tema den InterExpo na Den Haag

Lider di fraccion di MAS, drs. Marisol Lopez-Tromp ta na Hulanda y a participa n’e InterExpo na Den Haag unda cu nan a reuni cu diferente otro pais den reino Hulandes y tambe e miembronan di Tweede y Eerste Kamer na Hulanda, den un congreso cu ta trata igualdad den reino.

Diamars mainta a haya diferente presentacion entre otro riba e parti di combatimento di fraude, labamento di placa. Tambe riba e parti di tratado di impuesto. A haya presentacion riba e parti di clima y uitstoting di CO2, ki efecto esaki por tin riba e companianan y si e islanan tambe ta forma parti di esaki of no.

A haya presentacion tambe riba enseñansa. E apertura mes a tuma luga p’e secretario di estado Alexandra van Huffelen cu a habri e congreso aki, caminda cu a duna un presentacion di con e ta mira e parti di igualdad den reino.

Un di e presentacionnan cu sigur a resalta pa Lopez-Tromp tabata riba educacion, presenta pa un representante di Corsou, unda cu el a trece dilanti varios aspecto cu ta toca enseñansa, pero no solamente riba nivel di maneho, e nivel di finansa, pero tambe riba nivel di e muchanan mes. Kico nan ta experencia a consecuencia di situacion cu nan ta pasando aden, den klas. Esta nan a enfoca hopi mes riba e bienestar, educacion, e interaccion, comunicacion, full entre e docente y mucha y kico t’e cosnan basico cu falta.

Aunke cu a subraya, en particular e persepcion cu nan tin na Corsou, hopi di e aspectonan aki Aruba tambe y e otro islanan ta reconoce y el a enfoca masha tanto mes riba kico ta loke e mucha mes mester na material. Kico e mucha mes ta haya falta di dje den comunicacion, interaccion entre mayor y docente. Esaki tabata pa tin tur cos cu ta necesario p’e hoben, e mucha, na prome luga. Ta ehempel cu e orador a duna.

Segun Lopez-Tromp, e orador a haya algun reaccion den sala unda cu por bisa cu lo por bira un debate interesante pero e tempo tabata limita. Di parti di educacion tabatin un rapport cu a yega di papia riba dje durante IPKO, cu ta toca e parti di ‘kopzorgen’ di e studiantenan di Caribe y esaki tambe ta enseñansa. Solamente ta toca e studiantenan na Hulanda. Den e caso aki por bisa te cu diamars, unico accento cua pone riba dje ta p’e studiantenan cu ta biba na Hulanda, pa loke ta nan BSN Nummer, esta con nan por inscribi y registra nan mes na gemeente, pa nan por haci uzo di e parti medico, e parti huisvesting. Pero tin hopi otro mas aspecto p’e mucha y studiantenan cu tin cu cuminsa tene cuenta cu ne y te awe no a keda implementa a base dje rapport aki.

Esey tambe a menciona diamars mainta. Di parti di Lopez-Tromp representando MAS na Hulanda, e tipo di discusionnan aki ta importante pa haya un bista di reino Hulandes full, kico t’e situacion real den cada pais y a base di experticio di cada orador di e debatenan cu tin, pa formula pregunta pa nos propio gobiernonan.

HABRI PA SCUCHA

Segun Lopez-Tromp, e politiconan Hulandes cu tabata presente, tabata esunnan cu ta forma parti di comision den Tweede Kamer cu ta toca nos islanan Caribense. Tin masha hopi miembro mes, como 150 di cual un grupo chikito tin un interes specifico den e bienestar di nos islanan. Mas tanto nan representantenan tabat’ey presente durante di e congreso aki.