Marisol Lopez-Tromp: Anuncia campaña tres aña prome ta laga bo mustra instabiel

Recientemente, e lider di partido y fraccion di MAS, drs. Marisol Lopez-Tromp a reacciona riba e anuncio di parti di Movimiento Electoral di Pueblo (MEP) cu campaña politico a cuminsa bou di e motto: #stabiel. Den entrevista cu Enfoke, e politico a a expresa diferente factor pa cual e partido geel ta hustamente todo lo contrario na loke ta nan ta proclama di ta y tin varios motibo pa ta preocupa.

MAS ta tuma nota cu den comunidad gobierno no ta popular y no ta compronde e decisionnan cu ta tuma. Hende no ta compronde y ta sinti cu gobernantenan ta out of touch y esey ta e mensahe cu ta ricibi cada bes y tambe por mira riba rednan social. “Y no ta solamente for di simpatizantenan di partido di oposicion; e ta tur caminda,” segun Lopez-Tromp. “Den diferente hogar, e sentimento aki ta biba.”

E ta kere cu e anuncio cu campaña a start por ta un pretexto pa drenta tur e hogarnan rabia y papia cu e hendenan. Sinembargo, ta keda cu no ta normal pa despues di aña anuncia stabilidad cu bo no tin y duna instruccion pa prepara pa un campaña.

Ta hisa bandera, mientras cu pueblo ta den un periodo cu tur hende ta cremencha, mester baha gasto, ta dificil, tin hende no tin trabou. Lopez-Tromp: “Bo ta mustra mas instabiel cu bo ta mes, pasobra si bo tabata stabiel di berdad, anto bo ta traha y ehecuta loke bo a bin pa haci y cu tur e retonan cu bo ta topa na caminda.” E lider di MAS ta admiti cu e trabou di gobernante semper tin reto y dificultad. Sinembargo no ta hustifica cu ta anuncia campaña y pio ainda tres aña prome cu eleccion ta suppose di ta. 

Pa e relato completo, lesa edicion di TREMPAN