Marisol Lopez (MAS): Gobierno no ta cla pa habri frontera cu Venezuela

Pa e lider di fraccion di oposicion e Openbare Bijeenkomst (OB) sosteni diaranson mainta den Parlamento tabata un oportunidad cu e y su colega a probecha pa haci pregunta cu ta haya casi tur dia for di comunidad pa loke ta e tema di reapertura di frontera cu Venezuela. Na dirigi pregunta na prome minister, su homologo di husticia y asunto social, como tambe na e director di Veiligheidsdienst Aruba. Lopez-Tromp su angulo di pregunta no tabata asina tanto di e aspecto legal, pero mas bien practico; tocante e consecuencianan socio-economico pa nos isla.

Pa loke ta e parti di berdura y fruta, Lopez-Tromp a expresa cu no ta pasa un dia cu no ta ricibi keho tocante prijs den supermercado. Minister-president a reconoce cu prijsnan a subi y cu a pesar di a yega na acuerdo cu supermercado pa baha gasto di importacion, no ta wak e reduccion den prijs door di inflacion global. Kedando den e area di salud, a puntra tambe tocante transmision di malesa, specialmente si no tin un control.

Esey y e cantidad di persona cu a bin Aruba como turista, pero no a bandona e isla mas, tabata asunto cu, por ehempel, Minister Tjon a keda di bin bek cu informacion mas concreto. Asina tabatin otro pregunta cu e mandatarionan no tabatin disponibel inmediatamente pa duna na Parlamento. “No tur ora tur contesta ta bin of no tur ora sinta ki den nan ta bisa nan tin e contestanan cla. Nan a priminti di lo manda e contestanan aki, nos lo follow up, pasobra con cu bay bin, mane cu nan a indica fo’i inicio, nan ta sintando na mesa, pero nan no ta asina leu pa bay habri frontera y nan a splic’e riba e punto aki tambe,” asina parlamentario Lopez-Tromp a indica.

Pa e relato completo, lesa edicion di TREMPAN