Marco Berlis (MEP): DIMP ta sigura cu e sistema di BBO na frontera no lo aumenta prijs di producto na Aruba

Recientemente DIMP a haci un presentacion na Parlamento di Aruba tocante e tema di BBO na frontera. Despues di e presentacion coleganan Parlamentario a haci varios pregunta y a contesta tur. Na final a contesta tur inkietud di e coleganan y por a compronde cu enberdad e BBO na frontera aki no ta bay haci diferencia den prijs y gasto pa e comerciante y tampoco e ciudadano. 

Lamentablemente nos por a nota con e fraccion di AVP a sali por la goma y a yama tur comerciante pa gañado, DIMP pa gañado y gobierno pa gañado riba e tema aki. Y kende a bisa esaki? Benny Sevinger, parlamentario y ex-minister condena di a soborna y pa verduistering. Ken pueblo lo kere? Comerciantenan Uni, Departamento di Belasting, Miguel Mansur cu a declara cu BBO na frontera ta bon pa Aruba of un parlamentario condena di soborno y verduistering? 

Den e articulo aki lo mi resumi algun punto cu DIMP a trece dilanti den nan presentacion y entrevista di prensa riba BBO na frontera.

Kico ta e beneficionan pa comercia y pais

• DIMP a enfatisa cu no lo tin aumento den prijs di producto. E diferencia lo ta cu enbes cu e comerciante ta paga BBO “na final” e lo pag’e “adelanta.” Sinembargo e BBO aki cu paga adelanta por kita di nan bentanan mesora e mesun luna. Esaki ta haci cu e comerciante no ta keda cu un buraco financiero pero ta resolve mesora, pasobra e ley nobo aki ta facilita esaki. E areglo aki den ley ta haci cu e gastonan di e comerciante no ta subi. 
• E comerciantenan a boga pa e BBO na frontera y ta di acuerdo cu ne. Comerciantenan Uni a vocifera esaki a traves di Frans Ponson den un conferencia di prensa na november 2022.
• E BBO aan de grens ta atende cu e problema di e competencia inhusto cu e comerciantenan ilegal a crea contra comercio legal. Comercio legal ta paga BBO caba pero esunnan ilegal no. P’esey, BBO na frontera su entrada principal lo bin di e negoshinan ilegal cu no ta contribuyendo na BBO y na caha di pais Aruba. P’esey Comerciantenan Uni ta di acuerdo cu e BBO na frontera pasobra awo e comerciante ilegal mester hisa prijs pa via cu e tambe mester paga esaki awo. P’e motibo aki e BBO na frontera ta trece un “Level Playing Field” pa comercio en general. Kico esaki ta nifica? Awo tur comerciante legal y ilegal tin mesun gasto y nan prijsnan lo bira similar.
• E 40 miyon florin cu BBO aan de grens lo bay genera lo bin den su gran mayoria di e negoshinan ilegal. Sinembargo pasobra nan ta ilegal, nan no lo por trek af e BBO na frontera aki manera e negoshinan legal. Esaki lo por encurasha e negoshinan ilegal pa registra y legalisa nan mes den e sistema y asina contribui manera mester ta na economia di nos pais.

Nos por a nota cu AVP a sali cu varios mentira riba e BBO na frontera. Un fraccion categorisa pa nan mesun colega parlamentario Ryçond Santos do Nascimento como corupto y mentiroso. Un fraccion y partido berde cu ta opera bao di un cultura di cobardia y un grado di corupcion excepcional pa purba alcansa nan meta usando cualkier argumento falso cu e por haya. 

Ta ironico cu net esunnan cu tur dia a grita cu Minister Presidente Evelyn Wever-Croes ta un gran gañado a resulta di ta e mentirosonan di mas grandi di e siglo aki. E berdad no ta drumi, e berdad semper ta sali na cla!