Marco Berlis (MEP): Como tata bo tin tres rol importante pa cumpli cu ne

Tata ta asumi diferente rol, sinembargo estudio ta conclui cu tata tin 3 rol primordial: e protector, proveedor y disciplinario. Aunke mester bisa si cu E mamanan tambe por actua den e rolnan aki, e ta keda principalmente e rol di e tata.

E tata den e rol di Protector

E enfasis tradicional di un mama ta enfoca pa protege su yiu contra e forsanan of influencianan pafo di e hogar, entre otro, bullying, hendenan desconoci, cachonan peligroso, accidente, enfermedad. E instinto paternal di un tata tambe kier protege di tur esaki, sinembargo tambe nan kier prepara e yiunan tambe pa educanan con pa trata cu situacionan asina aki. Tur dos rol ta importante; e mama ta protege e yiu y e tata ta prepara e yiu. 

Un otro rol di e tata ta observa e ambiente social y conoce e amigonan di su yiunan. Ora cu su yiunan bay cas di un otro famia, nos sa kico tin den e cas ey? Nan tin arma den e cas? E bario tin criminalidad? Kico mi por haci pa protege mi yiu di un ambiente cu por ta un peliger pa nan? Tata tambe por garantisa e siguridad di nan yiu door di yuda forma nan ambiente social. Den otro palabra nan por wak e vecindario y por encurasha oportunidadnan pa por tin un miho siguridad, y por elimina tambe cualkier peliger for di e caminda di e mucha.

E tata den e rol di Proveedor 

E tata su habilidad di provee pa su famia ta depende di su sentido di responsabilidad, identidad y hombresa. Diferente cultura tin diferente mensahenan y creencianan di kico e rol di un tata mester ta. Sinembargo mayoria hogarnan unda cu tin ambos mayor ta biba hunto, hopi tatanan no ta e uniconan cu ta provee pe famia. Mester subraya si cu esaki ainda ta un rol importante cu e tatanan ta cumpli cu ne den famia.

E tata den e rol di disciplinario 

Pa prepara un mucha pa su futuro, e tatanan hopi biaha tin expectativa masha halto mes. Nan kier pa nan yiu ta exitoso, pa nan wak loke tin na e horizonte, pa nan aspira cosnan mas grandi y mas miho. Ta pesey e tatanan mester siña nan yiu con pa maneha nan impulsonan, con nan por tin trankilidad ora di ta bou di stress y con nan por lidia cu situacionnan den cual nan no ta crea peliger pa nan mes of pa otronan. E ta importante como tata pa siña e muchanan respet pa tur hende na tur momento y yudanan den nan disciplina pa traha huiswerk, haci trabaonan na cas y practica un deporte of hobby. Tur esaki ta inculca bon custumbernan cu lo yuda e yiunan pa madura y lidia cu e realidad di bida cu ta wardanan ora cu nan bira mas grandi.