Marco Berlis (MEP): Caso Ficticio di Benny contra Minister President Evelyn Wever-Croes a cay na awa 

Benny Sevinger y AVP ta acusa di forma di trincion su propio partner di coalicion Marisol Lopez-Tromp!

Despues cu nos por a wak cu e fechanan di caso Avestruz tabata yegando na september, Benito Sevinger a cuminsa dal salto di desesperacion y a cuminsa acusa Minister President di Aruba di corupcion cu tereno. Increibel pero berdad, e politico acusa den e caso di corupcion di mas grandi den historia di pais Aruba, ta inventa un storia pa trata na tacha e bon nomber di Minister President. Un intento baho pa desvia atencion di su caso den Corte cu ta bay continua cada luna te cu februari, e luna den cual Corte ta spera di dicta sentencia final den e caso di Avestruz. 

Miembro di fraccion di MEP den parlamento, Marco Berlis, a indica cu e por imagina cu Sevinger mester a haya un golpi fuerte diaranson atardi ora Ministerio Publico a saca un comunicado den cual Ministerio Publico ta seponeer Benny su denuncia contra Minister President y Marisol Lopez-Tromp. Asina e esfuersonan di desesperacion y panico di Benny a cay na awa y awo no ta ked’e nada otro mas, cu pa landa su so den su propio lama di corupcion.  

E atake traicionero contra Marisol Lopez-Tromp

Sinembargo, loke pa hopi tabata un sorpresa total, ta cu Benny no solamente a haci un acusacion falso contra Minister President Evelyn Wever-Croes pero tambe contra Marisol Lopez-Tromp. Kizas Benny y Mike Eman tabata kier a mata “twee vliegen in een klap!”. No ta nada straño cu un partido asina corupto manera AVP a bira ataca su “partner” den coalicion di un forma di trincion. Un AVP cu un biaha mas ta traiciona su partner den coalicion den oposicion, ora Benny a acusa Marisol tambe di ta corupto. Mientras Benny tabata ataca Minister President, el a tene bon scondi y keto cu el a acusa Marisol tambe! Mientras cu AVP, MAS y ACCION21 tabata reuni, planifica y strategia hunto con pa benta Gobierno abao, firma carta hunto na VNO, Mike Eman y Benny Sevinger hunto cu fraccion AVP tabata busca tur sorto di forma cobarde pa caba cu Marisol. Kizas ainda nan tin Marisol aden pasobra el a bay laga nan durante Gabinete Eman-II pa bira un Parlamentario independiente. En todo caso, e realidad ta cu e traicion di Benny y Mike ta conoci pa henter Aruba awo y lo ta interesante pa mira kico ta bay ta e desaroyonan den e coalicion traicionero di oposicion. Awo kende ta bay ta victima di AVP su siguiente traicion: e discipulo y pupilo Miguel Mansur? 

Actonan di traicion, trincion y corupcion ta parti di e “bon comun?”

Berlis: “Mi pregunta na Mike Eman ta: lanta acusacion falso contra gobernante drechi ta parti di bo “bon comun?” Traiciona un partner di bo coalicion di oposicion ta parti di bo “bon comun?” Sconde bo accionan cobarde pa ataca bo amigonan ta parti di bo “bon comun?” Aproba corupcion den bo partido y gobierno anterior ta parti di bo “bon comun?” Trincion tambe t’e demostracion di boso filosofia nobo di e “bon comun?” Bo fraccion ta aproba e tipo di accionan traicionero aki y ta defini esaki como e ”bon comun”? E filosofia aki ta den e man nan ekiboca pasobra AVP ta para net pa tur lo contrario! Manera mi a bisa anteriormente, tur cos ta indica cu esaki ta un gran “farsa comun!”,” ta loke e parlamentario a bisa por ultimo den su comunicado di prensa.