Manera a anticipa si no bin aanwijzing: Presidente di CAft a tuma retiro

Prof. dr. Raymond Gradus ta renuncia entrante dia 1 di februari 2023 como presidente di Colegio di supervision financiero di Corsou y Sint Maarten, Colegio di supervision financiero di Boneiro, Sint Eustatius y Saba y Colegio di supervision financiero di Aruba. Cu esaki su di dos termino ta finalisa un poco prome cu e fecha riba cual e mester a expira, esta dia 1 di juli 2023.

Ta for di momento cu “politiek Den Haag” a cuminsa evalua pa  duna Aruba su gusto y laga CAft cay, cu e opcion di posibel retiro a subi mesa. Gradus lo a laga sa na e politiconan cu e no ta politico y a busc’e pa haci un trabou di supervision financiero. Awo, si ta bay hunga politica cu “asunto serio aki”, anto definitivamente e no lo ta parti di e wega aki. Fuentenan yega na e relacion entre politica y CAft a canta e asunto aki adelanta, pero parce cu for di Den Haag y Oranjestad a opta pa toch sigui e baile, pero awo Gradus a dicidi di ranca plug y ata muziek a stop tambe.

E debate pa Aruba cumpli

Tur cos ta sinta rond di e echo cu na juni caba, despues cu Minister di Finansa, mr. Xiomara Maduro ta nenga di cumpli cu e 13 recomendacionnan di CAft riba presupuesto 2022, cu a conseha pa duna Aruba un “aanwijzing”. A keda draai y rek tempo, warda te fin di october, pa dicibi pa no duna dicho instruccion, aunke Aruba no a cumpli. Locual si a sosode ta, cu door di “meevallers” den forma di trabou eficiente y riguroso di DIMP na Aruba, cu a logra cobra extra impuesto y teniendo cuenta cu economia (door di turismo) ta mehorando, cu a drenta mas cen di loke a spera den caha di gobierno. A uza e “bon suerte” ey y Gobierno di Hulanda e ora a opta pa no duna aanwijzing mas. Pero consecuentemente Raymond Gradus y CAft a perde cara publicamente tambe y a bira obvio cu a schuif nan conseho un banda.

Version Raymond Gradus riba su retiro 5 luna prome

Raymond Gradus ta alabes catedratico di administracion y economia di sector publico y sector sin animo di lucro na Universidad Liber (VU) di Amsterdam. Combinacion di e dos funcionnan menciona ta un responsabilidad masha pisa, asina e ta menciona. Ademas durante e lunanan binidero Gradus kier haci varios biahe dirigi riba mundo academico. E ta mira atras riba añanan emocionante y intensivo como supervisor di e islanan y paisnan di ex-Antia Hulandes. Actualmente ta buscando un sucesor apto, kende lo cuminsa entrante dia 1 di februari 2023.

Ken ta Raymond Gradus?

Prof. dr. Raymond Gradus ta presidente di Cft desde dia 1 di juli 2017. Riba 1 di juli 2020 a renombra dr. Gradus pa un di dos periodo di tres aña. Banda di su funcion di catedratico e ta vincula tambe na Departamento di Accounting di VU y na Centro Zijlstra pa Control Publico, Liderazgo y Gobernacion (Zijlstra Center for Public Control, Leadership & Governance) y e ta miembro di nivel halto di Instituto Tinbergen. Prof. Gradus tin varios publicacion cientifico riba su nomber, tocante entre otro, siguridad social, cogobierno, maneho di medio ambiente y finansa publico. Ademas e ta presidente di e Comision di Auditoria di Conseho di Supervision di Scol Superior di Den Haag (HHs).

Tocante CAft Riba dia 2 di september 2015 a institui College Aruba financieel toezicht (CAft), conoci tambe como Colegio di Supervishon Financiero Aruba. Nan tarea ta encera monitoria y duna conseho, riba adaptacion y ehecucion di presupuesto di pais Aruba, kedando den balans y den e limitenan acorda, pa por cumpli cu pago di debenan. CAft por duna conseho sea cu Gobierno a pidi of no. Contrario na e otro paisnan den Reino Hulandes, pa Aruba ta aplicabel un norma di saldo di financiamento, pues e saldo presupuestario kitando e pago di e debe estatal. CAft ta consisti di Raymond Gradus (Presidente), Hans Hoogervorst (postula pa Hulanda) y Hellen van der Wal (postula pa Aruba).