Mandato di e miembronan di SPA ta cla y raspa: Polis no ta traha pornada!

Rolando Maduro vice-presidente di Sindicato di Polis (SPA) a duna su declaracion despues di nan reunion cu e mandatario encarga cu husticia Rocco Tjon. Na su salida el a duna di conoce cu nan punto ta cla y ta spera di scucha for di e mandatario manera el a indica.

Durante reunion a pone riba mesa e punto principal cu ta e anuncio di adaptacion di overtime pa timeback. Den combersacion y riba tono di dialogo a presenta na minister nan preocupacion y nan punto di bista riba e situacion. E mandatario di su banda a duna di conoce cu prome cu diabierna lo ta den contacto cu e sindicato bek, pa asina sa den palabracion fiho kico ta bay pasa relaciona cu decision riba overtime cu gobierno a tuma.

Pregunta cu a bin dilanti den reunion y cu a haci na minister di husticia ta : Kico ta bay pasa cu tur e oranan traha y acumula caba? Tambe a puntra con esaki ta bay keda paga? Ta trata di entre otro e lunanan di juni, juli, augustus como tambe e luna aki ainda di september. Ta di spera cu e pagonan aki keda pago husto manera mester ta, como cu ta trata di pago prome cu e decision di gobierno a keda anuncia.  

Di su banda, Minister di Husticia Rocco Tjon a duna di conoce cu prome cu tur cos, e lo tin cu acerca Minister di Asuntonan General, Minister President Evelyn Wever-Croes pa mira con e decision riba overtime ta hinca den otro. Lo tuma e siman aki pa delibera e inkietud di SPA cu minister president y lo ta den contacto bek cu sindicato SPA prome cu e fin di e siman aki. Locual cu Minister Tjon practicamente a garantisa na SPA cu nan pago lo ta 100% paga.

Segun Rolando Maduro, e incertidumbre ta cay awo riba con ta bay keda cu e pagonan cu ta di despues di 15 di september. Despues di e declaracion cu minister president a haci publicamente riba pago di overtime ( despues di cierto cantidad di ora) lo bira time back, no a cay den bon tera cerca ningun ambtenaar. Sigur no cerca sindicato di polis cu a presenta na reunion pa asina haya tende kico ta locual ta bay tuma luga di e fecha indica en adelante.

A compronde cu medida tin cu keda tuma di parti gobierno en conexion cu KPA, a enfatisa riba e echo cu tin palabracionnan haci cu e altocomisario nobo y cu ministerio cu tambe ta na vigor y ta spera cu nan lo keda respeta. Poco poco lo sigui mira y tene na cuenta con lo sigui atende cu cuerpo policial, como cu ta trata di siguridad nacional.

Pa garantisa siguridad di e pueblo en general, como tambe di e polisnan. Mirando tambe cu e decision a keda tuma caba, lo tin cu analisa e situacion sea semanal of cada pasa 2 siman, pa mira con esaki ta cana, con lo atende cu ne si acaso no yega na palabracion y con esaki ta bay devalua e trabou y servicio, pero asina mes garantisando e siguridad di nos pueblo.

Mandato di e miembronan di SPA ta duidelijk: Nan no ta traha pornada!

Polis no ta traha pa time back pero mas bien pa locual cu en berdad ta traha p’e. Esaki ta fiho entre tur colega cu ta traha diariamente. E ta bisto cu cuerpo policial ta scars den polis. No tin suficiente polis awo caba. No solamente polis pero na e otro departamentonan tambe, manera Duana, Kia, Migracion, Brandweer y e otro dienstnan importante caminda tin te kort na personal, pero tambe tin mester di yena e te kort aki.

A compronde cu e fin di siman aki lo bira uno basta druk pa nos isla, caminda cantidad di turista cu lo yega nos isla lo ta hopi halto. Migracion mes ta un di e dienstnan cu lo ta scars di personal, den situacion precario y asina mes tin cu pone atencion na e pilar principal di nos isla, cu ta turismo.

Ta keda na e directornan tambe pa duna indicacion y presenta esaki na minister, cu tin scarsedad di personal y lo tin cu ubica personal na cierto postnan principal caminda entre otro Polis, Kia, Duana mester di hende na trabou mientras comercio tin cu sigui draai. Ta premira cu esaki lo trece un snowball effect cu no lo sali na beneficio di ningun hende, ni e pueblo, ni comercio ni tampoco e polis cu ta e trahado incansablemente.