Mandatario y studiante a dialoga riba relacionnan den Reino

Den transcurso di diahuebs tabatin un presentacion na e Haagse Hogeschool cu Prome Minister Evelyn Wever-Croes, Minister di Finanzas Xiomara Maduro y Minister Plenipotenciario Adi Thijsen a atende. E topico tabata Asuntonan di Reino, un programa cu desde 2019 ta forma parti di e curiculo na e universidad aki. Fuera di a scucha e presentacion, e mandatarionan tambe a comparti cu esunnan presente, incluyendo alumnonan Arubiano, tocante e plannan riba tereno financiero, di energia, turismo y economia.

Marcel Daniëls, ta un docente di ciencia di gobernacion, pero tambe esun responsabel pa e programa di di asuntonan di reino. El a expresa na 24ora.com cu tabata un dia extraordinario caminda e studiantenan, kendenan tin seis luna hayando les tocante reino y sigur di Aruba, tabatin e oportunidad di combersa cu e mandatarionan. El a confesa cu pa nan tambe tabata un experiencia apart door cu ta trahando duro pa conoce otro miho den reino.

A puntra e docente su opinion riba e reclamo cu den reino tin un deficit di democracia, caminda e islanan no tin suficiente di bisa y dicidi kico ta pasa. Daniëls ta di acuerdo cu esey, declarando cu “Absolutamente por papia di un deficit democratico. Tin un Conseho di Minister di Reino, pero no tin un Parlamento di Reino y p’esey un representación den parlamento ta importante pa e stem for di Caribe por resona.”

Di su banda, Tai Kong Trimon-Lee, un studiante Arubiano di Rechten na Hogeschool Avance y Fontys na Tilburg tambe a keda complaci cu e oportunidad di por a scucha directamente for di e mandatarionan, e pensamentonan cu tin pa cu e relacionnan den reino. Na Hulanda desde augustus ultimo, e tabatin oportunidad pa haci pregunta y ta bay cu e impresion cu gobierno ta haciendo su best. 

Pa e relato completo, lesa edicion di TREMPAN