Makaku ta hunga ku su yu te ora e saka su wowo!
Biaha pasá minister presidente Pisas a bisa ku pais ta fayit, awó ta e bùrt pa CMC.
Willemstad — E rapòrt di Nederlandse Zorgautoriteit no a bisa nada nobo. Fo’i 2016 e Belganan, den e rapòrt di ‘Tussentijdse Evaluatie HNO’, a informá parlamento i e propio gabinete Pisas 1 ku e gastunan di konstrukshon di CMC por bira 50 porshento mas karu i ku e gastunan di operashon di HNO/CMC komo konsekuensia di esei lo ta substansialmente mas haltu ku di SEHOS. Nan a kalkulá sigur un 60 mion mas pa aña.
Insinuashon infantil
Komo doño di kos, ku e deklarashon di fayit, Gobièrnu Pisas mes ta bolbé kibra e imágen di Kòrsou i su hospital meskos ku e ta kibra moral di trahadónan di hospital.
Ademas, ku e deklarashon aki di un minister presidente, ta kua kompania lo ke sigui entregá produkto na hospital CMC sin eksigí pago dirèkt, manera a sosodé despues ku na 2012 a bisa meskos di SEHOS?
Pa kiko e deklarashon aki di minister presidente? Ta pasobra ke kore ku un direktor yu di tera, manera e ministernan di finansa i enseñansa a anhelá riba Facebook?
Awor si for di 2016 nos sa ku e operashon di hospital lo bai kosta mas ku 60 mion èkstra pa manehá kompará ku SEHOS, dikon pretendé ku ta mal maneho di e direktiva aktual ta kousa di tur kos? Si e direktor entregá su retiro awe, e problema di hospital i su nivel di kuido ta solushoná? Apsolutamente ku no. Nos tur sa ku ta subi gobièrnu mester subi e presupuesto di CMC i baha gastunan den salubridat públiko, presis manera IMF i Cft a bisa gobièrnu. Gabinete Rhuggenaath si a tuma medida pa baha gastu di entre otro spesialistanan, remedi i kuido den eksterior. Gobièrnu Pisas a keda ku e mes konseheronan ku a konsehá pa tuma e medidanan aki. Ki dia ta sigui ku implementashon di e maneho?
Struktura ta di MFK mes
Ta gabinete Pisas na 2016 mes a urgi pa aprobá i implementá e struktura di HNO Holding ku bou di dje, HNO Exploitatie/CMC i HNO Vastgoed. Un struktura proponé fo’i 2013, ma awó ta pretendé ku ta otro a invent’e. Ta asina sa lubidá?
Ta bon pa sa ku e hospital ta den sektor kolektivo, esta ta parti di sektor gubernamental paso por medio di su fundashon yamá HNO Holding, gobièrnu mes ta doño di CMC. Pues si gobièrnu ke, e formateur amigu di gobièrnu nombrá pa MFK, por kambia e statutonan di CMC. Tambe mester kòrda ku e konsepto pa un Ministeriële Regisseur i Toezichthouder (MRT) ta produkto di gabinete Pisas 1. Imposibel ku eksponentenan di MFK a lubidá esei tambe!
E motibu
Mirando e echonan aki nos ta puntra nos mes ta dikon e gobièrnu aki ke venená pueblo kontra algun hende i kiko e ta skonde? Ta prima di seguro e ke subi? E bisa esei anto!
