Magaly Brito (SEPPA): Ta comun cu e hefenan na Post Aruba N.V ta maltrata e trahadonan

Manera ta conoci, desde siman pasa e trahadonan di Post Aruba NV a drenta den accion, prome pa algun ora, djey a rek e pa 8 ora y finalmente, riba dialuna, minister Geoffrey Wever a presenta y a papia cu e trahadonan riba e diferente inkietud y mal contento cu ta reina entre nan.

Magaly Brito, secretario general di Sindicato di Empleado Publico y Priva di Aruba (SEPPA), a indica di ta contento cu e minister a haci un acercamento y a mustra boluntad pa bin scucha kico t’e preocupacion di e trahadonan y e pakico nan tabata para pafo y pakico nan ta dispuesto pa sacrifica y hiba un lucha di dia largo, contal cu nan derecho ta respeta.

Pero tambe e trahadonan a bisa cu si dado caso nan mester drenta paden y tin represalia di parti di gerencia, tin maltrato, tin gritamento, tin uzo di palabra robes, for di e momento ey bek lo convoca un otro accion pa motibo cu e tipo di actitud asina no lo ta tolera mas p’e trahadonan.

A EXPRESA MALCONTENTO

E trahadonan a haya chens pa expresa nan malcontento contra e forma con ta atende cu e problema aki cu nan tin n’e minister, esta e falta di ahustacion di salario y dos aña bayendo di e 105 florin, e proposicion di parti di Post Aruba NV cu tin riba mesa, rechasa p’e trahadonan y cu di banda di post no ta mustra cu tin boluntad pa bin bek na mesa, pa sigui negociacion y busca un solucion.

Fuera di esey tin tambe tin e echo cu tur e dianan aki ta para pafo cu malcontento y for di ningun momento ta haya ni di parti di gerencia, ni di parti di Raad cu ta representa pueblo den e compania aki, no a mustra ni sikiera un intencion pa bin papia, bin puntra y scucha e otro banda.

MALTRATO VERBAL TA COMUN

Na Post Aruba NV ta basta comun y na hopi ocasion SEPPA a trece e keho aki cu di banda di e hefenan ta maltrata e trahadonan den forma verbal, menasa nan cu “si bo no gusta esaki t’e porta.” Lastimamente ta papia di trahado cu tin hopi aña di servicio cu ta haya tipo di trato aki.

Di un otro banda por mira tambe cu unico momento cu e doño di trabao ta coba den un CAO, ta p’e busca e buraco of caminda cu e ta haya formula pa e por duna “warning” of tuma medida riba un trahado.

Pero ora ta trata derecho di trahado, ta busca tur sorto di excuus pa bisa si e por paga of no por paga.