Luis Fernando Borjas ta canta pa aniversario di Grupo di Betico

Manera 24ora.com a publica anteriormente, tin un proyecto internacional andando den conmemoracion di e 55 aniversario di Grupo di Betico. Produccion di esaki ta continua cu e bishita di e cantante Venezolano Luis Fernando Borjas como e artista invita mas reciente pa graba e video clip di e tema conhunto cu e ta interpreta.

Borjas por ta un nomber no masha conoci pa nos na Aruba, sinembargo e tin un trayectoria masha amplio, ademas di un conexion special cu nos isla. Pa esunnan cu conoce e mundo di gaita y gaita Zuliano, en particular, e fam si ta zona. Esey ta pasobra Luis Fernando ta subrino di Neguito Borjas, fundado di e agrupacion Gran Coquivacoa y un leyenda di e genero musical aki.

Su participacion den e proyecto di aniversario di Grupo di Betico a bin a traves di un invitacion di parti di e productor internacional Raniro Palm cu ta forma parti di e proyecto. Luis Fernando a bay pa sa mas di nan y ta compara nan hopi cu Guaco. “Nan tin hopi aña, a pasa mas di un generacion y e historia y tur cos mi ta haya encantador y fascinante”, el a expresa. E ta haya cu e manera di haci musica ta similar na e tamborera di Venezuela.

Ora cu a puntr’e pa splica di su relacion cu nos isla, e cantante a recorda cu e prome biaha cu el a uza un paspoort, ainda na hoben, tabata pa biaha bin Aruba. E tabata un experiencia bunita cu a lag’e namora di nos isla. Posteriormente el a bin un par di biaha mas, incluyendo cuater aña pasa hunto cu su señora na estado. Net durante nan estadia, a ricibi e email cu ta bisa cua ta e sex di e baby y aki ta caminda nan a celebra cu nan ta bay haya un mucha homber.

Actualmente Luis Fernando ta masha contento trahando riba su mesun material. E ta trahando cu varios productor y musico cu e ta scoge personalmente. E ta haya e proceso ey masha bunita, cu e tin hopi pasion p’e. E prome tema tabata ‘La Miraita’ cu a capta hopi atencion. Mientras tanto tin dos cancion mas a sali y ta kere cu pa november, e disco completo lo ta cla.

E ta gradici e isla henter declarando su mes un amigo. “Na mi amigo y rumannan di Grupo di Betico, cu musica sigui uni nos. Aki boso tin un ruman, un Croes mas dispuesto pa traha cu boso y comparti tur e biahanan cu Dios pone esey den nos caminda.” Borjas a finalisa deseando Grupo di Betico hopi aña mas di existencia. 

Pa e relato completo, lesa e edicion di TREMPAN