Long Table Aruba: E mesa di mas largo na Aruba organisa pa Wind Creek Aruba ta bek den su di cinco edicion

E di cinco edicion di Long Table Aruba, organisa pa Wind Creek Aruba, ta bek pa un anochi, e unico mesa di cena di mas largo completamente blanco cu un balor di $50,000 na Aruba!

E evento di e aña aki lo tuma luga diadomingo 11 di juni y lo conta cu un mesa largo di 1000 pia cu lo wordo prepara pa 1000 invitado riba L.G Smith’s Boulevard dilanti Renaissance Wind Creek Aruba Resort.

Ticket pa entrada lo ta $50 y lo ta pronto disponibel pa benta. Desde aña 2017, Long Table Aruba a recauda mas di $225.000 pa organisacionnan local y ta un evento sumamente importante pa Wind Creek na Aruba.

E evento di e aña aki tambe lo marca e di seis aniversario di Wind Creek Hospitality hunto cu Renaissance Aruba. Pa celebra e momento aki, Wind Creek Hospitality lo entrega 5 organisacion $10.000 na cada un, pa un total di $50.000 di donacion, cual lo ta e suma di mas hopi cu Long Table Aruba lo entrega te cu awor.

“Nos ta compronde e importancia di conecta cu e comunidad y nos ta desea pa sostene organisacionnan local na e manera cu lo realmente beneficia e comunidadnan di Aruba,” asina Paul Gielen, Wind Creek Aruba General Manager a declara. E aña aki nos kier a duna mas tanto organisacion e chens pa participa, aportando asina pa por logra cu nan mision pa mehora nos isla.”

Cuminsando desde awe; 28 di april, organisacionnan local cu ta interesa pa forma parti di e competencia por registra na Wind Creek Aruba su ‘community online video program’, organisacionnan local lo tin cu crea un video splicando e motibo pakico nan ta desea pa ricibi e donacion aki. Tur video cu wordo entrega lo wordo publica riba Wind Creek Aruba su website unda cu pueblo di Aruba lo por vota pa e 5 video nan ganado di e aña aki.

Tene e siguiente puntonan den consideracion:

·         Solamente organisacionnan local – non profit y cu ta activo por participa na e competencia (empleado den servicio di Wind Creek Aruba no por participa) 

·         Lo mester entrega un video di 30 pa 60 seconde mustrando e meta di e organisacion, ken nan ta, kico nan ta haci y pakico nan ta desea pa wordo scogi 

·         Lo mester upload e video aki riba e link Long Table Aruba | Wind Creek Aruba prome cu dia 22 di mei 2023

·         Tur video ricibi lo wordo publica sin ordo riba e pagina di Facebook di Long Table Aruba pa pueblo di Aruba por admira

·         Pueblo por vota pa nan video preferi entre 22 di mei te cu 4 di juni 2023 

Mescos cu aña pasa, e comunidad di Aruba lo determina cual organisacion lo beneficia di e premio di e aña aki via un proceso di votacion online cu lo cuminsa desde 22 di Mei. Haci un impacto den comunidad y duna alivio durante calamidad ta un principio di operacion di Wind Creek Aruba. Desde yegada di Wind Creek na Aruba nan a recauda fondo pa medio di diferente evento, manera Long Table Aruba y Winter Wonderland como tambe un cantidad di donacion di cuminda cu a wordo entrega henter aña na organisacionn- y personanan den necesidad.