Locual por a spera: Grupo grandi a tranca trafico y pone fever na entiero

Un aglomeracion hopi grandi a pone patruya di diferente districto mobilisa den area di dakota, como tambe e funeraria caminda cu entiero di e hoben Angel Senra Chara a tuma luga.

Accidente cu lamentablemente  a costa bida di e hoben riba brommer. Ainda por corda cu a pidi pa autoridad pa presenta cu maximo urgencia riba Watty Vos Boulevard, poco prome cu e rotonde di Wayaca, pa un accidente hopi grave. Esaki a tuma luga aproximadamente 7:30 pm entre un auto y un brommer. Na yegada en berdad polis a constata cu tabatin un motociclista seriamente herida benta na suela y un auto cu a bolter y tabata memey di caminda. Despues di hopi esfuerso di rescate a logra transport’e pa hospital caminda cu lamentablemente el a bin fayece debi na tur e golpinan ricibi.

Awe tardi lo tabata tumando luga su acto di entiero y aki ta caminda cu e situacion, cu por a spera, a surgi. Diferente amigo coredo di brommer cu a presenta pa duna nan ultimo despedida lo a cuminsa cu fever na e sitio caminda cu accidente a sosode. Esaki no ta mucho leu for di e funeraria caminda entiero tabata tumando luga.

E trafico a stagna por completo mientras varios di e brommernan aki, acompaña pa algun vehiculo cu a dicidi di cera e caminda riba nan mes. Despues cu a ripara cu diferente patruya lo tabata na caminda, nan a mobilisa nan mes direccion Dakota, pa ta exacto den Macubaristraat, caminda un biaha mas a cuminsa cu fever den e cayanan di Dakota.

Diferente patruya a bin atende cu nan y asina a purba di domina e situacion pa despues pidi cada motociclista den area pa bandona e sitio. Esaki no a bay facil, hopi di nan no kier a coopera cu polis pero un rato despues a dicidi di sigui ordo di polis y sigui nan caminda. Entre nan tabatin un chauffeur cu lo a cera caminda y cu a ricibi un boet pa su acto. Un rato despues situacion a normalisa y ta spera cu esaki keda asina aki pa e dia di awe.