Localmente tin hopi temor y ta prefera tene cera

Frontera cera cu Venezuela ta keda un tema di atencion y discusion. Despues cu Camara di Comercio di e islanan Hulandes den Caribe a haci apelacion pa habri frontera, fo’i Venezuela mes tambe a bin un señal cu nan ta cla pa dal e paso. Y ta parce cu awo tur cos ta den man di Aruba (y e otro islanan) si ta tuma e decision. E reto ta cu na cas mes, hopi local ta prefera pa tene e frontera cera, pa evita cu e retonan socioeconomico cu ta asotando nos isla bisiña, lo por muda y yega Aruba.

Por corda ainda cu na juli ultimo a dicidi di prolonga e decision di februari 2020, pa cera e frontera entre Venezuela y islanan Hulandes den Caribe. Extra-oficialmente a compronde cu Hulanda mes no tin problema mas pa habri e frontera, basta cu e islanan por controla e situacion. Y ta parce cu e islanan a pone cierto condicion cu mester cumpli.

Gobernador di Estado Falcon, Victor Clark, siman pasa den un entrevista na e radioemisora 98.7 FM y riba cuenta di Instagram di Gobierno di Estado (@gobierno_falcon) a sigura diabierna ultimo cu di parti di Gobierno di Presidente Nicolas Maduro a aproba y autorisa tur e cosnan necesario pa reinicia, a corto plaso e relacionnan normal di intercambio cu e islanan di Caribe.

“Nos ta sperando den e proximo dianan of siman e posicion y contesta riba e posicion cu Venezuela ta cla y prepara pa un etapa di un relacion nobo di respet, cooperacion, trabou y intercambio mutuo. Di parti di Gobierno di Nicolas Maduro ta aproba y autorisa tur cos relaciona pa nos re-inicia a corto plaso. Ora cu nan kier y dicidi nos aki na Falcon ta cla.

Na momento cu Gobierno di Aruba a anuncia e prolongacion anterior cu 6 siman, e tabata parce un indicacion cu cos ta cla. Pero esey tabata momento tambe cu Aruba tabata den discusion cu Hulanda riba cumplimento di sugerencianan den cuadro di e ayudo pa deficit presupuestario. Sinembargo, a bolbe prolonga e decision di mantene frontera cera pa tres luna, cual lo vence na october.

Principalmente e aña’ki tabatin hopi contacto entre entidadnan di Aruba cu autoridad na estado Falcon riba apertura di e frontera. Y den e ultimo encuentro di e camaranan di comercio a bolbe tuma un decision pa insisti na Gobiernonan cu apertura di e frontera ta masha importante pa e islanan. Vice-presidente di Fedecamaras di estado Falcon, Juan Gotopo, tabata na Aruba y a reuni cu entidadnan comercial local.

Comerciantenan di Falcon tambe ta den reunion continuo cu autoridadnan di e estado pasobra cu ciere di frontera, a stop di exporta mas di 60 mil ton di fruta y berdura, sin conta otro producto cu tambe tabata manda pa Aruba, manera material di construccion, cuminda pa animal, productonan plastico, etc.

Juan Gotopo a bisa recientemente cu nan a reuni cu diferente aerolinea, cu a bisa cu nan tin intencion di habri ruta asina kita e medida di restriccion di vuelo. Aproximadamente seis aerolinea a demostra nan intencion di cuminsa bula asina cu kita e restriccion.

E islanan ABC ta importa cada aña casi cuater mil miyon dollar na mercancia. Segun comerciantenan di e pais bisiña, nan por abastece un gran parti di e productonan cu lo por yuda e pais y e region cu recuperacion economico. Aunke e prijsnan no ta manera antes, pero cu e distancia cortico, e prijs lo por ta menos toch.

Mester menciona cu localmente, e asunto aki ta causa sentimento mixto. Mientras cu lo tin un grupo, primordialmente comerciantenan Venezolano biba na Aruba cu ta desea pa habri e frontera pa por haci negoshi cu nos isla, di otro banda hopi ta teme pa e problemanan cu nos lo importa. Sin habri frontera caba por mira con droga ta spula na nos costa, con boto ta yega casi diariamente cu ciudadano ilegal, importacion ilegal di droga y bestianan exotico. Tambe tin e aspecto di prijsnan descontrola, cu sin duda lo afecta e mercado local. Hopi di e negoshinan Venezolano ta dispuesto pa bende na prijs ridiculamente abou, djis pa haya acceso na dollar Mericano, cu lo por tin un influencia negativo pa negoshi local.

Ta bon pa corda tur hende cu Venezuela no a cera frontera cu Aruba pa motibo di pandemia, sino pa motibo cu e presidente a acusa Aruba y e demas islanan ABC di lo ta importa oro horta di Venezuela. Gobierno di Nicolas Maduro a sigura cu tin hende tabata horta oro di nan minanan, pasa via Aruba y manda pa refineria di oro na Dubai. Tambe a acusa nos di ta horta hero bieu di nan refinerianan y manda Aruba pa aki nos bende na Europa como scrap-material.

Despues Aruba a cera e frontera di nos banda tambe, debi na retonan mara na e pandemia, etc. Tambe Aruba a adapta ley pa a evita cu carga por drenta Aruba for di e pais bisiña, incluyedo pisca. Pa awo, Venezolanonan cu kier y por bin Aruba, ta haci esey via Republica Dominicana, Panama of Colombia. No tin vuelo directo entre Aruba y Venezuela pa algun aña caba awo.