Lo otorga premio nacional “Crioyo di Oro” den luna di november

Na aña 2021 Jossy Brokke Jr. tabata e prome artista homenahea y otorga e premio nacional aki pa su excelencia artistico y pa 65 aña di aporte na desaroyo cultural di Aruba. 

Premio nacional “Crioyo di Oro” ta un premio crea y presenta pa Fundacion Go Cultura como estimulo na e baluartenan local cu ta forma parti di sector di arte di tarima (performing arts: cantante, musico, actor, poeta, cineasta, promotor y mas), cu a impacta nos comunidad di un forma impresionante y cu a dedica nan bida largo na desaroyo positivo y adelanto cultural di Aruba.

E aña aki Fundacion Go Cultura a anuncia desde 17 di augustus cu publico general tambe por participa den e proceso di nominacion pa e proximo persona, personanan of grupo(nan) cu lo ricibi e premio aki. Por a nota un reaccion grandi for di nos comunidad cu a nomina varios persona cu nan ta desea di mira ricibi e premio prestigioso aki. 

Pa por considera un persona door di e comision di Fundacion Go Cultura, tin varios rekisito cu e persona mester cumpli cu ne. Entre otro, e persona mester ta na bida, e mester a dedica su bida largo y di un forma excepcional y bisto na e adelanto cultural di Aruba, e mester por gosa di un bon reputacion den comunidad y su aporte por demostra hopi cla con el a hisa e perfil di e industrianan cultural y creativo di Aruba, impactando desaroyo cultural, social y hasta economico.

A resta un siman mas pa publico general por nomina esun cu nan ta kere cu merece “Crioyo di Oro”. Dialuna 10 di october proximo lo anuncia nomber di e ganado di e premio aki pa 2022. 

Esaki lo habri caminda tambe pa e celebracion y homenahe di gala cu lo tuma luga dia 30 di november 2022. Publico por asisti na esaki, manera cu tabata e caso di december 2021 cu a dedica e homenahe na Jossy Brokke Jr.

E premio mes, ta un diseño di Fundacion Go Cultura y un produccion di artista Gilbert Senchi. E tin un simbolismo hopi particular cu ne di exito, desafio, fracaso, perseverancia, consistencia, superacion y excelencia. Abo tambe por nomina bo baluarte cultural faborito y bo por nomina mas cu un persona.  Nos ta invita bo pa scan e QR-code pa bo haya acceso na e pagina digital of bishita e pagina di Go Cultura Foundation riba Facebook pa bo por click riba e link pa bo haci bo nominacion.