Ley di impuesto of di medida?: Planea pa e siman aki den staten

No tin un fecha oficial ainda pero awo cu tur minister y parlamentario a regresa di nan biahe pa Europa, awo mester core pasa varios ley “den cinco speed” prome cu nan baha cu vakantie. Diabierna awo Parlamento di Aruba ta baha cu reces y a invita tur hende pa un almuerso den restaurant pa celebra. Pero por lo menos un di e leynan cu mester pasa ta cambionan fiscal cu lo haci nos pais hopi mas caro otro aña. Specialmente comercio y e industria di turismo lo haya nan cu hopi mas gasto y aumento den impuesto. 

Lamentablemente parce cu tur hende ta keto y man crusa pa mira e barco sink cu nos tur aden. Gobierno a traha un presupuesto ficticio y un mayoria a aprob’e sin realisa cu a aumenta entrada di turismo den forma ficticio pa e cifranan por mustra bunita, pero cu den realidad no ta asina. ATA ta pronostica cu turismo “lo por” crece cu 5% otro aña, pero Gobierno a opta pa pone 10% den presupuesto pa aparente entradanan hopi mas halto di turismo y riba dje a tuma parti di e entradanan di ATA pa mercadea turismo, pa nan hinca den caha di gobierno mes. 

Situacion mundial

Mundialmente e perspectiva economico financiero NO ta positivo! Hopi economia ainda ta recuperando di e pandemia. Interes ta aumenta, mercadonan laboral ta preta, guera na Ukrainia a causa un crisis di energia, gasto di transportacion mundialmente a aumenta, un inflacion ta brotando rond mundo, subiendo gasto di bida, importacion ta birando mas caro pa nos mercadonan, fo’i unda nos ta importa tur mercancia y tambe fo’i unda nos turistanan ta bin!

Asina ta, nos economia tambe ta bin mas y mas bou di presion! Masha bunita cu e cantidad di turista ta na nivel di aña 2019, pero esey ta pa un gran parti door cu turistanan no por a biaha durante pandemia y a hala nan ticket pa awo!

Ta ora pa hala faha mara

Tur hende mester hala faha mara y traha dam warda awa…..esaki ta conta pa gobierno tambe!

Awor aki mester maneha y corta gasto, pa ora esaki nan subi door di e motibonan menciona ariba. Nos accijns ya caba ta pone cu bebida alcoholico y gasolin ta esun di mas caro den henter Caribe! 

Lista di medida cu Parlamento mester aproba:

Awo, masha bunita pa extende e añanan pa compensa e perdidanan di pandemia, pero na mesun momento ta choca comercio cu:

• Aumento di BBO;

• Salario ficticio pa comerciante cu ta director/accionista di su propio compania;

• Prohibi deduccion di interes pa fiansanan di propio seno;

• Elimina posibilidad pa crea pensioen den propio nehoshi;

• Limita depresiacion di edificio;

• Elimina facilidad di IPC pa hotelnan;

Tur esaki bou di capa di move impuesto directo pa indirecto….pero internacionalmente esaki semper ta sosode na un manera presupuestario neutral. No pa yena caha di gobierno barbaramente cu mas placa! Ademas, den añanan venidero, Gobierno lo ricibi mas entrada door di e inflacion (BBO!) y un mercado laboral cu lo extende cu mas camber di hotel nobo!

Efecto lo ta desastroso

E medidanan menciona, hunto cu e aumento di logeergastenbelasting di 9,5% pa 12,5% lo afecta nos economia / turismo di forma desastroso durante e añanan venidero! Mester accentua cu cada medida ta causa un reduccion di cashflow pa comercio; mester fia na banco, caminda interes ta aumentando! Ademas, nos sector turistico ya a bende e highseason, anto awor lo mester absorba tur e efectonan di e plan aki.

Gobierno ta contradeci su mes

Tene cuenta cu t’e trahadonan lo haya e cuenta presenta. Fiscalmente un maneho irrespetuoso y sin pia sin cabes, pasobra e dos puntonan di % rebaho di winstbelasting lo no yuda; lo no tin ganashi. Pesey a extende e añanan pa compensa perdida di ultimo añanan. E rebaho di tarifa ta pa esunnan cu ya caba no ta paga loonbelasting, of manera Hulandesnan ta bisa “…een sigaar uit eigen doos!”

Maneho sin pia ni cabes

Finalmente, e plan ta carece di ta parti di un vision integral financiero economico. Consecuentemente, NO tin maneho apropia! Diferente otro cambio y limitacion drastico, sin cu gobierno por indica pakico y cuanto nan lo genera…..‘Legislacion ocacional’. Cuminsa mehora eficiencia den DIMP y Duana cu leynan mas facil y moderno y no complica y anticua.