Leu for di cas pero cu curason semper na Aruba

Eduardo Mario Goeloe, di 30 aña di edad ta un Arubiano, cu actualmente ta trahando como maestro na Willem de Zwijger College. 

Diestres aña pasa el a bandona su isla pa bay Hulanda pa e sigui studia y asina siña mas hopi cu e por. Asina, e dia cu e bin bek cu su conocemento pa yuda nos dushi Aruba. Lastimosamente, el a tuma nota cu cada aña mas hende ta muri door di alcohol combina cu velocidad halto y ultimamente mas y mas door di violencia. 

Esaki ta algo cu ta kibra su curason, paso tur ora cu a papia di Aruba unda cu ta na mundo e ta bisa cu orguyo nos ta “One Happy Island” y cu nos isla ta sigur. Su intencion no ta di culpa niun hende, e ta kere cu nos tur tin cu cuminsa na wak nos mes. “The man in the mirror” y wak kico nos por haci como mayor, amigo, colega pa nos yuda, cuida y stima otro. Asina por logra pa por tin e sentimento di trankilidad riba nos Isla. 

Normalmente Goeleo ta publica videonan motivational riba su Youtube page “Dream Believe Achieve” pero e biaha aki el a dicidi di post un video cu ta papia di su precupacion pa cu e situacion actual.