Laga nos reconoce e bondad di Dios

Oh, purba y mira cu Señor ta bon, bendiciona ta e hende cu ta tuma refugio den dj’E (Salmo34:8).

E wowonan di Señor ta riba e hustonan, y Su horeanan ta atento pa scucha nan sclamacion. E cara di Señor ta contra hacido di maldad, pa corta e recuerdo di nan kita for di riba tera (Salmo 34:15+16).

Ta deber di tur mayor pa splica esaki na nan yiunan tur dia, no cansa di papia, pasobra tur bon instruccion cu abo como mayor duna ta coopera pa salba alma di bo yiu, pero tambe ta aporta pa un bon ciudadano.

Maske cuanto maldad y inmoralidad, ta avansa , e bondad di Dios lo keda resalta pa semper.

Bo tabata sa mescos cu tin hende ta inverti den guera y arma, tin hende ta inverti den inmoralidad y scuridad, y diferente otro sorto di bagamunderia.

Pasobra nan no ta mira e bondad di Dios, pero solamente ta concentra,riba nan propio interes, negoshi, clientela, amistad, voto, fama, asociacion, y tur esey ta hiba mundo riba e caminda di apoyo di maldad, en bes di busca e bendicion di Señor.

No sea gaña mi rumannan stima:Tur bon regalo y tur don perfecto ta for di ariba,y ta baha bini for di e Tata di e luznan, cerca kende no tin variacion ni sombra di cambio (Santiago 1:7).

E malvado no tin mester di droga of bebe pa e haci malo, pero pasobra scuridad (diabel) ta domina su bida e ta haci maldad, p’esey ta urgente pa nos sigui persevera den bondad, pa asina e generacion aki, compronde e bondad di Dios pa cada un di nos su bida.

E bondad di Dios ta wordo reconoce di siguiente forma:

Dios tin compasion: ma Abo Oh Señor ta un Dios yen di compasion y gracia, kende no ta rabia lihe,y ta abundante den misericordia y berdad.( Salmo 86:15)

Dios ta Fiel: Pasobra e palabra di Señor ta berdadero, y tur su obra ta haci den fieldad.( Salmo 33:4)

Dios ta pordona: Si nos confesa nos pica, Dios ta fiel y husto di pordona nos, nos picanan y pa limpia nos di tur inhusticia (1 Juan 1:9).

Pa Dios nada ta imposibel, tur loke ta imposibel pa hende ta posibel pa Dios (Lucas 1:37).

Señor ta bon pa tur y su misericordia ta riba tur su obranan (Salmo 145:9).

Tambe e malvado lo wordo reconoci di e siguiente forma:

Bo ta stima maldad mas cu loke ta bon, mentira mas cu loke ta papia corecto, bo ta stima tur palabra cu ta devora, oh lenga engañoso.

E hustonan lo mira y teme, y lo harie bisando: Ata e homber cu no kier a haci Dios su refugio, ma a confia den su abundancia di rikesa, y a fortalece su mes den su mal deseo (Salmo 52)

Pasobra e malvado ta gaba di e deseo di su curason: E ta bendiciona e hende golos y ta desprecia Señor.

E malvado,cu su cara yen di orguyo, no ta busca di Dios. Tur su pensamentonan ta: No tin Dios.

E ta bisa den su mes, lo mi no wordo movi, pasobra nunca lo mi haya mi den adversidad. Su boca ta yen di maldicion, engaño y opresion bao di su lenga tin perversidad y maldad.

E ta bisa den su mes Dios a lubida, E a sconde su cara E lo no mira esaki nunca (Salmo 10).

Awendia tin hopi hende ta kere esaki, p’esey inmoralidad y maldad ta avansa cada dia.

Ta p’esey Dios a entrega a manda su yiu unigenito, pa ken cu kere den dj’E no bay perdi ma haya bida eterno.

Sinceramente,

Pastoor Marcel Balootje.