Aqualectra lo denunsiá e ladronisia na outoridat
LADRONISIA DI WAYA DI KORIENTE A BOLBE LANTA KABES I TA PONE UN AREA GRANDI PÉRDÉ KORIENTE
Willemstad 20 di òktober 2022 – Illegalidat di kita wayanan di suministro di koriente i bai ku esakinan a bolbe lanta kabes. Durante di e último dianan, na dos okashon, klientenan den un área spesífiko a mèldu Aqualectra su sentro di kliente ku nan a pèrdè koriente. Durante investigashon di e kousa di pèrdida di koriente, téknikonan di Aqualectra a keda konfrontá ku un situashon kaminda intenshonalmente a kousa un deskonekshon riba ret di distribushon di Aqualectra, p’asina kue e wayanan di koriente ku ta pasa den e pòstenan di Aqualectra. E akto ilegal aki a tuma lugá den bario di Rooi Santu. Aproksimadamente 100 kas a keda perhudiká ora ku malechornan a kometé e akto di ladronisia, poniendo ku e kasnan aki mester a keda sin koriente te ora ku por a bolbe instalá wayanan di koriente di nobo. Aparte di perhudiká e klientenan di Aqualectra i kousa Aqualectra gastu innesesario, e ladronnan ta pone nan mes bida na peliger ku e akto aki. Aqualectra ke atvertí ku lo atendé ku man duru ku tur esnan ku ta kometé e akto aki.
Pa basta tempu Kòrsou no a konosé e tipo di ladronisia aki. Sinembargo e insidentenan, un tras di otro, ta indikashon ku ladronisia di e forma aki a bolbe lanta kabes. Ámbos ladronisia a keda kometé den oranan di mardugá pa habri mainta. Na e sitio por tuma nota ku e ladronnan no ta tene kuenta ku e peliger ku nan ta eksponé nan mes na dje ora nan kometé e akto konsehabel aki.
Aqualectra tin atenshon speshal pa e ladronisia di kabel di koriente i a denunsiá e kasonan aki na outoridat. Aqualectra ke pidi koperashon di komunidat pa na dado kaso nota algun individuo ta intentá òf kometé e ladronisia aki, pa mesora raportá esaki na Aqualectra. Aqualectra lo apresiá si por saka potrèt òf video di e situashon ya ku esaki ta yuda den atendementu di e kehonan.
