Kòrsou ta representá na e di 19 foro di e asosiashon di paísnan i teritorionan di Ultramar di Union Europeo
Willemstad – Na Nouméa, e kapital di e archipelago Niew-Caledonië ta tumando lugá e di 19 foro di e asosiashon di paísnan i teritorionan di Ultramar di Union Europeo (OCTA) di 17 pa 22 di novèmber 2022.
Kòrsou huntu ku 12 otro teritorio di Fransia, Dinamarka i Ulanda ta forma e asina yamá LGO-nan.
Dia 18 di novèmber 2022, manera ta e kostumbèr durante di e foro anual, e Minister Plenipotensiario di Kòrsou, sr. Carlson Manuel, representando Promé Minister sr. Gilmar Pisas, a dialogá ku representantenan di e Direktorado General pa Partnership Internashonal (DG INTPA) di Komishon Europeo, riba e proseso di programashon di e fondonan Europeo ku Kòrsou a risibí durante di e último añanan.
Tambe a papia riba e programa pa Kòrsou pa e periodo 2021 – 2027. Ta asina ku aktualmente Union Europeo i Kòrsou ta den e fase di implementá un trajekto balorá na kasi 17 miyon Euro ku lo mester redundá den un komunidat kurasoleño mas sostenibel ku e kapasidat di fasilmente lanta bèk for di eventual kontratiempo.
Pa e periodo nos dilanti ku ta kore di 2021 pa 2027 e espektativa ta ku dentro di poko Kòrsou lo por haña e grato notisia ku nos lo por konta ku un finansiamentu di 18.7 miyon Euro pa e desaroyo sostenibèl di nos pais.
