MINISTERIO KONSERNÍ ENSEÑANSA, SIENSIA, KULTURA & DEPORTE
KONFERENSIA EDUKASHON I TEKNOLOGIA 2022
PUBLIKÁ RIBA 28 ÒKTOBER 2022
WILLEMSTAD – Minister di Enseñansa, Siensia, Kultura i Deporte(ESKD) sr. Sithree van Heydoorn a hasi apertura di e konferensia: ‘Education with Technology’ di Universidat di Kòrsou (UoC) 2022 ku a selebrá nan di 5 aniversario. E konferensia tabata tin komo tema sentral: Edukashon i Teknologia i a tuma lugá dianan 25, 26 i 27 di òktober 2022 na UoC.
Meta di e konferensia ta pa trese tur e diferente ‘stakeholdersnan’ ku tin relashon ku enseñansa i teknologia huntu pa interkambio di idea, eksplorá, dialogá i debatí riba e desaroyonan nobo. Gruponan di enfoke ku a bini huntu ta institushonnan edukashonal, direktivanan di skolnan, profeshonalnan di enseñansa i edukashon, skolnan i tur otro organisashon ku di un òf otro manera tambe ta enkargá ku enseñansa i teknologia. UoC a establesé un sentro pa siña di forma digital (Center for Digital Learning-CDL) komo un departamento pa stimulá inovashon i teknologia i na mes momentu usa ICT pa sigui traha i integrá programa edukashonal den nan prosesonan. Tur esakinan ta hasi edukashon na e fakultat nan mas atraktivo i fleksibel pa studiantenan di era moderno. P’esei CDL komo sentro di digitalisashon di UoC ta tene e konferensia pa asina sigui traha i stimulá inovashon den e kuadro aki.
Temanan ku a keda presentá ta: digitalisashon di enseñansa, blended learning, e-learning i hopi mas. Durante di e konferensia tabatin oradornan di Karibe, Estado Unidos i Hulanda. Pa mas informashon por bishitá www.cdl-uoc.org.
*riba e foto athunto por tuma nota di Minister sr. S.van Heydoorn na e konferensia Education and Technology 2022 UoC
