Kompetensia fuerte entre tur 6 ekipo pa loke ta Lipo Elhage RBI 2022
WILLEMSTAD – Temporada di Lipo Elhage RBI 2022 patrosiná pa MCB ya a kulminá ku e di tres fin di siman di kompetensia. Un tremendo trabou di organisashon pa logra reprogramá tur e weganan ku mester a keda kanselá e promé fin di siman pa motibu di áwaseru pa asina awor e kampionato ta bek riba skema. Despues di e promé tres fin di siman nan di kompetensia e 6 ekiponan tur ta hopi serka di otro ku únikamente Sta. Rosa Indians ku un poko bentaha riba e sobra ekiponan. Un diferensia di únikamente dos wega ta loke ta separá e lidernan for di e ekipo den sotano.
Pa loke ta resultadonan di weganan di fin di siman tras di lomba. Den promé wega djasabra Marchena Braves a bataya fuerte ku e aktual lider nan di kampionato Sta. Rosa Indians pero finalmente a kai vensí ku skor di 8-7. Picher ganador pa Indians tabata Gion Oleana miéntras ku picher pèrdèdó tabata Chelton Jones. Pa Sta. Rosa Aiverson Martis a bai di 2-2 na bate i Pharel Wever tambe di 2-2 pa Marchena. Seguidamente Royal Scorpions Cardinals a gana di Sta. Maria/Firebirds Padres ku skor di 9-4. Picher ganador pa Cardinals tabata Denzel Trinidad i Kendrick Kleinmoedig a bai di 3-2, Maryelo Chirino tabatin un honron. Picher pèrdèdó pa Padres tabata Aiden van Kimmenaede i Nathan Cijntje a bai di 4-3. Finalmente djasabra Wild Cats/St. Michiel Dodgers a logra un viktoria di 5-3 riba Groot Kwartier Astros. Picher ganador tabata Nathan Isenia i Greggson Juliana a bai di 3-2. Picher pèrdèdó tabata Johaimry Balentina i dos bateado a bai di 2-1 pa Astros, Welton Lourens i Whiashan Pieters.
Djadumingu tambe tabatin tres wega programa i den promé wega Cardinals a gana Dodgers ku skor di 3-2. Picher ganador Jordyan Henriquez i picher pèrdèdó Jurion Reina. Miho bate pa Cardinals tabata Narvin Meyer di 1-1 i Kendrick Kleinmoedig tabatin un honron. Pa Dodgers Greggson Juliana tambe di 1-1. Despues e ekipo di Braves a gana fásilmente di Astros ku skor di 11-3. Pa Braves e picher ganadó tabata Quishanic Martis i Guilendry Doran a bai di 4-3. Pa Astros e picher pèrdèdó tabata Welton Lourens i Johaimry Balentina di 2-2 na bate. Den último wega di e hornada aki Padres a sorprendé Braves ku un skor di 7-6. Ku e viktoria aki e tabla di posishon ta indiká kon pèrta e aktual kampionato ta ku sigur ta alsa e nivel di kompetensia. E kampionato ta kontinuá próksimo fin di siman ku e último weganan di e aña aki. Despues di un pousa kòrtiku kampionato di Lipo Elhage RBI 2022 lo lo sigui e fin di siman di 7 di yanüari 2023.
Tur wega ta tuma lugá na Tio Daou Ballpark. Kòrda ku weganan di lipo Elhage RBI Curaçao 2022 por keda sigui di forma digital via iScore i tambe semper por bishita e website http://www.rbicuracao.com, unda por haña tur informashon i resultadonan. RBI Curaçao tin su propio twitter account tambe bou di @CuracaoRbi i ya manera sa kaba tin e página riba Facebook. E kampionato ta posibel danki na MCB, CBDF, KNBSB, MLB i Fundashon pa Nan.
