KLM ta inmortalisa Cas Ecury cu miniatura Delft blauw

KLM Royal Dutch Airlines ta celebra su di 103 aniversario riba 7 di october 2022, un ocasion cu tradicionalmente ta bay hunto cu e presentacion di e cas miniatura Delft blauw. E casita di e aña’ki ta un replica di uno hopi special pa isla di Aruba: Cas Ecury.

E decision di scoge un cas na Aruba ta basa riba e echo cu na 2023 Aruba ta bay cumpli 100 aña di aviacion. Tambe Cas Ecury, cu awendia ta sede di Museo Nacional Arkeologico, ta cerca di e luga caminda e prome avion a baha na Aruba. Fuera di esey, famia Ecury a hunga un papel importante den e desaroyo di aviacion riba nos isla.

President y CEO di KLM, Marjan Rintel a bin Aruba pa presenta e casita na Agustin Vrolijk, como gobernador interino y na famia Ecury. Esaki a tuma luga den un ceremonia dilanti di Cas Ecury diabierna anochi den presencia di varios mandatario, ehecutivo di sector turistico, aereo y comercial, ademas di otro invitado.

Joost Meijs, CEO, di Aeropuerto Internacional Reina Beatrix Queen Beatrix a mustra un bunita pelicula cu ta conta e historia di aviacion na Aruba. “Mi no por imagina un miho manera pa cuminsa cu e aniversario di proximo aña, celebrando 100 aña di aviacion na Aruba, cu e regalo aki di KLM; poniendo un cas di Aruba den nan coleccion di casnan miniatura Delft blauw. E casita aki ta marca e di 103 aniversario di KLM y ta un gran antesala pa e celebracionnan di centenario na 2023, cu ta involucra henter e comunidad.”

“Nos ta extremadamente orguyoso di nos herencia cultural y p’esey nos ta hopi honra cu KLM a scoge e mansion iconico aki, e compleho Ecury, como e siguiente cas miniatura. Nos ta hopi honra cu Aruba su herencia cultural awo lo biaha pa tur destino di KLM rond mundo,” asina Su Excelencia Gobernador interino Agustin Vrolijk a expresa.

Marjan Rintel, CEO y President di KLM a indica: “Mi no sa si e fundadornan di KLM por a imagina bek na 1919 cu nos lo ta ainda celebra e aerolínea su aniversario 103 aña despues. E aña aki nos ta haciendo esey na e bunita Aruba, un destinación di KLM pa casi cincuenta aña, caminda nos ta iniciando e celebracionnan awe pa marca un centario di aviacion riba e isla.”

Nieta di Dun Dun Ecury, Caresse Issings, un conocido poeta riba su mes, a declama na Papiamento un poesia inspira pa e recuerdonan di su niñez den e cas. Invitadonan por a sigui e poesia cu subtituloman na Ingles. Artista Elvis Tromp a crea e anochi aki mes, en bibo, un pintura di e edificio. A regala e pintura na e CEO di KLM. Nietonan Monique y Boy Jr. A ricibi e prome dos casita.

KLM su prome vuelo pa Aruba tabata casi 90 aña pasa y a haci di nos isla su hub operational pa servicio regular den Caribe. KLM a cuminsa opera servicio regular entre Amsterdam y Aruba na 1974 y awendia ta opera vuelonan diario entre ambos destino.