Ni ku un operashon rapido riba kaya nan no por a logra salba e viktima.
ROTTERDAM – Djasabra riba un terasa yen di persona na Tiendplein den Rotterdam Jaison Sanches di 30 aña a bin perde su bida. E mener di kickboxing ku tabata traha den su bida diaro den kiudo a risibi 6 pa 7 tiru di bala.
Personalnan di ambulans a purba na salba e viktima su bida i nan a hasi un operashon riba kaya. Pero tur esaki tabata en bano paso Sanches a fayese den hospital na konsekuensia di su heridanan. Amigunan di e viktima ta den tristesa profundo, niun hende no ta kompronde dikon el a wordu asesina di e manera ei. ” E tabata biba den besindario, tur hende tabata konose. E tabata traha ku personan hendikep i tabata un hende hopi amabel,” asina un konosi ta konta. Sanches, un Rotterdammer di nashonalidat di Cabo Verde tabata segun su amigunan un ehempel pa tur hende.
Den e kareda di 22.20 kosnan a bai kompletamente robes riba Tiendplein den Rotterdam-West. Jaison Sanches tabata para ku su amigunan riba e terasa di e restorant Marokano Ryad. Segun e testigunan un homber deskonosi a kue su arma. E persona tabata bisti den pañanan kolo skur i e tabata tin un kapuchon bisti riba su kabes, e persona deskonosi ei a los varios tiru riba Sanches i pa despues e kore bai den direkshon di Zijdewindestraat.
Paniko
Na momentu ku e tirunan a zona, e personan ku tabata e momentu ei riba e terasa na Tiendplein a skonde bou di mesa, otronan a kore bai. E paniko tabata grandi. E viktima ku tabata gravemente herida tabata riba suela. Mientras ku Sanches tabata lucha pa su bida, polis tabata en buska di e sospechoso. Pero nan no a logra di kue.
E tim forensiko ta hasi investigashon na e luga di e tiroteo.
E polisnan di Rotterdam a pone un tim grandi disponibel pa resolve e kaso di asesinato
Por lo menos un 20 reshershi ta en buska di e sospechoso. Polis ahinda no tin niun idea dikon Sanches a wordu tira i kiko a pasa prome ku e tiroteo. Polisnan ta den kombersashon ku testigunan di e incidente i tambe nan tin videonan di kamara. E tim forensiko ta en buska di pistinan na e luga di e suseso. Tambe polis ta en buska di mas videonan di kamara, potret of grabashonan riba telefon di personan ku tabata den besindario di Tiendplein. Nan ta spera ku nan por haña mas informashon tokante di e ruta ku e sospechoso a tuma.
