Na: Presidente di Parlamento di Kòrsou
Sra. Ch. America-Francisca
Wilhelminaplein 4
Presente
Willemstad, 8 febrüari 2023
Tópiko: Diskrepansia den trato di e persona ku ta ámtenar aktivo i e eks – ámtenar ku a bandoná servisio promé ku edat di 60 aña (derechi di apliká pa “overgangsregeling”).
Honorabel sra. America-Francisca,
Señora presidente, pa medio di e karta aki suskrito ke hasi uso di artíkulo 96 di Reglamentu di Òrdu i ta pidi enkaresidamente pa bo persona por dirigí e karta aki ku e tópiko: Diskrepansia den trato di e persona ku ta ámtenar aktivo i e eks – ámtenar ku a bandoná servisio promé ku edat di 60 aña (derechi di apliká pa “overgangsregeling”) na Minister di Maneho di Gobernashon, Planifikashon i Servisio Públiko sr Ornelio Martina.
Atentamente,
Zita Jesus-Leito, MBA
Frakshon di PAR
Na: Minister di Maneho di Gobernashon, Planifikashon i Servisio Públiko
Sr Ornelio Martina
Plasa Horacio Hoyer 9
Willemstad Curaçao
Willemstad, 8 febrüari 2023
Tópiko: Diskrepansia den trato di e persona ku ta ámtenar aktivo i e eks – ámtenar ku a bandoná servisio promé ku edat di 60 aña (derechi di apliká pa “overgangsregeling”).
Apresiabel minister Martina,
Nos a tuma nota ku for di yanüari 2016, na momento ku a hasi kambio den e ordenansa di penshun di empleado públiko (PB 78 di aña 2015, Pensioen Landsverordening Overheidsdienaren ) entre otro en konekshon ku subida di edat di penshun di ámtenar di 60 pa 65 aña , a surgi un diskrepansia i desigualdat den e trato i derechi ku diferente kategoria di ámtenar tin pa ku nan penshun.
Parlamento a disidí na 2015 ku e grupo di ámtenar entre edat di 55 i 59 lo mantené e derechi pa kobra nan penshun ora nan hasi 60 aña. Sinembargo den lei a hasi un distinshon entre ámtenar aktivo i no aktivo (“slaper”) na momentu ku e kumpli 60 aña di edat E problema aki a surgi komo resultado di e redakshon di artíkulo 110c insiso 1 i 2. Resultado di e redakshon aki ta perhudiká un grupo basta grandi di eks ámtenar sin ku esaki tabata e intenshon. E adaptashon mester tuma lugá pa asina drecha e fout aki. Esaki lo mester tuma lugá den artíkulo 110c mes.
Nos a komprondé ku ya pa basta tempu tin un proposishon di kambio di lei riba mesa . Pero nunka e kambio a yega parlamento pa keda trata pa asina trese hustisia pa esnan ku ta eks ámtenar. Komo parlamentario , representante di pueblo nos no por para mira ku ta perhudiká eks ámtenar di e manera aki pa por haña nan derecho. Ademas nos a komprondé ku esaki ta afektá por lo ménos 500 eks ámtenar.
Ta p’esei nos ta aserka bo ku e siguiente preguntanan:
- Minister ta na altura di e problemátika aki? A tuma nota di e proposishon di lei aki?
- Minister ta na altura ku esaki ta perhudikando bastante eks ámtenar?
- Minister a tuma nota di e proposishon pa kambio di e artíkulo 110c pa remediá e situashon ?
- Tin un fecha kaba ku e proposishon aki lo yega parlamento pa keda trata?
- Minister por splika nos ta dikon e lei aki a tarda pa yega Parlamento ya pa mas di 6 aña kaba miéntras ku ta trata di un korekshon di un fayo?
Nos ta spera un kontesta riba término hopi kòrtiku pa asina evitá ku e personanan ariba menshoná di edat respetá i di un trayektoria largu di trabou pa nos komunidat ta sigui sufri e konsekuensia amargo di no por kobra loke ta toka nan.
Atentamente,
Zita Jesus-Leito, MBA.
Miembro di Parlamento di Kòrsou
