Na: Minister di Enseñansa, Siensia, Kultura i Deporte.
Sr. C. van Heydoorn
WTC
Willemstad 12 desèmber 2022
Tópiko: status di rekonosementu di ekipo di futbòl R.K.S.V. Jong Colombia ken a titulá 3 biaha kampion di Karibe
Honorabel sr. van Heydoorn,
Ta bai hasi 1 aña (12 yanüari 2022) ku mi a pidi Sr. Minister pa duna e meresidó rekonosementu na e ekipo di futbòl R.K.S.V. Jong Colombia ken a titulá 3 biaha kampion di Karibe den pasado.
Den Minister su karta fecha 2 mart 2022 Sr. Minister ta kontesta mi petishon bisando, ku ora e
maneho riba e parti rekonosementu di nos deportistanan ta kla, e ora ei lo atendé e rekonosementu di R.K.S.V. Jong Colombia.
Pero lástimamente te ainda nos no a tende nada mas di Sr. Minister ofer di e maneho riba e parti rekonosementu di nos deportistanan, ni di rekonosementu di R.K.S.V. Jong Colombia ken a titulá 3 biaha kampion di Karibe den pasado.
Mirando ku tempu balioso ta pasando komo e hungadó nan di e tim nan ku a bira kampion ta di edat hopi avansá (algun hasta ya a fayesé), mi ke urgí Sr. Minister pa no warda te ora e maneho menshoná ta kla i siguí mesora ku e rekonosementu di hungadó nan di R.K.S.V. Jong Colombia komo baluarte di pais Kòrsou en espera di e maneho.
Tambe mirando ku R.K.S.V. Jong Colombia a bira supkampion e aña aki di nos Promé Divishon, lo ta un gesto bunita di parti di Gobièrnu pa duna e rekonosementu aki mesora.
Sperando di a kontribuí positivamente i sperando un pronto reakshon,
Atentamente,
Steven Croes
Frakshon di PAR
CC Representante di e ekipo di R.K.S.V. Jong Colombia
Lizette Sambo-Velder, Sector Directeur Sport en Cultuur, Ministerie OWCS
