WILLEMSTAD – Inspektor ta imponé mas ku 300.000 aanslag pa aña. Na momento ku e kontribuyente risibí e aanslag, e tin e derechi di entregá un karta di opheshon na Servisio di Impuesto. Debí na entre otro e akshonnan di kobransa ku masalmente ta tumando lugá aktualmente, pa motibu di e aanslagnan ku a keda imponé den e di dos mitar di 2021 i kuminsamentu di 2022, e kantidat di karta di opheshon a subi notablemente. Durante luna di sèptèmber a registrá 5613 karta di opheshon nobo i a finalisá 5784 karta.

Servisio di Impuesto tin algun ophetivo pa por finalisá e kartanan di opheshon ku nan ta risibí na tempu. Un karta di opheshon mester keda registrá, klasifiká segun grado di difikultat i asigná na un empleado denter di dos siman. Sin Embargo, debí na e kantidat haltu di karta di opheshon ku ta drentando, no ta tur biaha ta posibel pa kumpli ku e ophetivo akí. Na momentu ku atendé e kartanan di opheshon, ta hasi distinshon entre karta di opheshon atministrativo i karta di opheshon ku kontenido. E karta di opheshon atministrativo ta keda entregá pa motibunan atministrativo, por ehèmpel debí na un pago ku keda prosesá robes òf pa motibu di un deklarashon ku a keda marká komo retrasá. Ta papia aki di un karta di opheshon ku por keda atendé relativamente lihé dor di un empleado atministrativo. E kartanan di opheshon ku kontenido ta esnan ku un aspekto fiskal. Ta trata di kartanan di opheshon ku a keda mandá debí na un aanslag ku a keda imponé a base di pr ehempel un investigashon di Stichting Belasting Accountants Bureau (SBAB). Esakinan ta mas kompliká i ta keda atendé dor di un persona ku ta regla e aanslag òf inspektor.

E ophetivo ta pa finalisá 100% di e kartanan di opheshon atministrativo denter di un término di 90 dia. Pa kumpli ku e ophetivo aki a parti e kartanan di opheshon atministrativo na dos: risibí promé ku yanüari 2022 i risibí despues di yanüari 2022. E kartanan di opheshon ku a keda entregá promé ku yanüari 2022 mester keda a finalisá promé ku 1 di òktober 2022. Pa e kartanan ku a keda entregá den 2022, e término 90 dia ta keda apliká. Pa kartanan di opheshon ku kontenido ta e meta pa finalisá 99% denter di e periodo legal di 90 dia.

Aktualmente ta trahando riba un query ku un ICT-provider eksterno pa por mónitòr e proseso di kontinuashon di e kartanan aki. Banda di esaki Servisio di Impuesto ta haña yudansa di empleadonan di SBAB pa por kaba di atendé e kartanan di opheshon mas lihé. Awor ku Servisio di Impuesto a rekuperá e retraso den imponementu di aanslag pa práktikamente tur medio, e ekspektativa ta ku e kantidat di karta di opheshon lo baha strukturalmente na aña 2023 i konsekuentemente Servisio di Impuesto por kumpli ku e ophetivonan.