KAMPIONATO HUBENIL 2022-2023 TA INISIÁ, DJASABRA 17 DI SÈPTÈMBER 2022!
Djasabra 17 di sèptèmber 2022, Kampionato Hubenil 2022-2023 ta inisiá den Stadion Rignaal ‘Jean’ Francisca i na tereno di Willemstad. E wikènt aki e kategorianan di mas chikí lo mira akshon miéntras e sobrá kategorianan lo kontinuá den e próksimo wikèntnan te ku yüni 2023, ora Kampionato Hubenil 22-23 yega na su final.
E aña aki Kampionato Hubenil ta konta ku un total di 21 klup ku tin un total 126 tim ku lo partisipá den kategoria U-9 te ku U-20 kontra otro, na diferente tereno rònt Kòrsou.
Kategoria U-9 te ku U-15 lo ta den kontienda durante e próksimo simannan miéntras kategoria
U-17 ku U-20 lo inisiá mas despues.
Manera tur aña Komishon Hubenil ta spera ku e kampionato aki tambe lo ta unu éksitoso, deportivo ku e meta pa desaroyá kada hungadó den nan abilidatnan futbolístiko pero tambe pa tur mucha disfrutá na un manera sano di nan deporte preferí.
E inisio di e kampionato aki lo konta ku palabranan di e presidente di FFK na komienso di e partidonan den Stadion Rignaal ‘Jean’ Francisca pa despues bala kuminsá lora na ámbos tereno.
Komishon Hubenil ta deseá tur ekipo, e hungadónan, nan entrenadónan, dirigentenan i nos kuerpo di arbitrahe, hopi éksito durante Kampionato Hubenil 22-23!
Skema pa e wikènt aki;
| Stadion | Kategoria | Tim di Kas | Bishitante | U-9 | U-11 |
| Willemstad | Liga 1 (U9) | Inter Willemstad A | F.C. Sithoc | 9:00 | – |
| Willemstad | Liga 1 (U9) | Stallions F.C. (A) | VESTA | 9:00 | – |
| Willemstad | Liga 1 (U11) | Inter Willemstad A | Stallions F.C. (A) | – | 10:30 |
| R.J.F | Liga 1 (U9) | Atletiko Saliña A | Centro Juve B | 9:00 | – |
| R.J.F | Liga 1 (U9) | C-Stars United A | Centro Juve A | 9:00 | – |
| R.J.F | Liga 1 (U11) | C-Stars United A | Atletiko Saliña A | – | 10:30 |
| R.J.F | Liga 1 (U11) | Atletiko Saliña B | UNDEBA | – | 10:30 |
Un invitashon ta bai pa pueblo di Kòrsou kompletu pa bin apoyá i sostené esnan mas chikí den nos famia di futbòl. Bin ku henter bo famia i disfrutá di algun tremendo partido di futbòl i mira kon nos futuronan di mañan ta bria riba tereno.
Kòrda ku tur e partidonan aki ta grátis!
