KAMPIONATO FEMENINO 2022-2023 TA INISIÁ, DJABIÈRNÈ

11 DI NOVÈMBER 2022 DEN STADION RIGNAAL ‘JEAN’ FRANCISCA!

 

 

Djabièrnè 11 di novèmber 2022, Kampionato Femenino 2022-2023 ta inisiá den Stadion Rignaal ‘Jean’ Francisca. E siman aki algun ekipo lo mira akshon miéntras otro siman tur ekipo lo enfrentá otro tur wikènt te ku yüni 2023, ora Kampionato Femenino 22-23 yega na su final.

 

E aña aki Kampionato Femenino ta konta ku un total di 9 klup ku tin 17 tim ku lo partisipá den kategorianan U-15, U-17 i Senior, kontra otro na diferente tereno rònt Kòrsou.

Manera tur aña Komishon Femenino ta spera ku e kampionato aki tambe lo ta unu éksitoso, deportivo ku e meta pa desaroyá kada hungadó den nan abilidatnan futbolístiko i hasi futbòl femenino mas atraktivo p’asina yuda engrandesé futbòl femenino aki na Kòrsou.

 

E inisio di e kampionato aki lo konta ku palabranan di e presidente di FFK i Presidente di Komishon Femenino na komienso di e partidonan den Stadion Rignaal ‘Jean’ Francisca pa despues bala kuminsá lora.

Komishon Femenino ta deseá tur ekipo, e hungadónan, nan entrenadónan, dirigentenan i nos kuerpo di arbitrahe, hopi éksito durante Kampionato Femenino 22-23!

 

Skema pa apertura femenino;

Stadion	Kategoria	Orario	Tim di Kas	Bishitante
RJF	U-15	19:00	UNDEBA	Centro Juve
RJF	U-17	19:00	Jong Holland	Hubentut Fortuna
RJF	Senior	20:30	Inter Willemstad	SUBT

Un invitashon ta bai pa pueblo di Kòrsou kompletu pa bin apoyá i sostené nos damanan. Bin ku henter bo famia i disfrutá di algun tremendo partido di futbòl i mira kon nos damanan lo mustra kiko tur nan tin aden.

Kòrda ku tur e partidonan aki ta grátis!