K.F.C. ta lansa: ‘Racing Hope for All’

Diamars ultimo a tuma luga un rueda di prensa caminda cu gerencia di KFC Aruba a anuncia e proximo actividad cu lo bay tuma luga dia 27 di november, p’asina recauda fondo p’e hazaña di mas grandi cu Brainer y Disjonrick lo haci hunto na Aruba.

E campaña aki ta titula ‘Racing Hope for All’.

Segun Johanna Jacobs, relacionista publico di KFC Aruba, pa varios luna e duo aki a bin ta train p’e hazaña aki. Nan ta logrando nan soño y nan no kier hacie nan so. Nan kier pa mas hende den comunidad haci esaki.

Ta p’esey ta pidi Aruba pa warda su florin p’e hazaña aki.

Jacobs a splica cu diadomingo, dia 27 di november, “wak bo tin bo florin”, pasobra cu un florin cu contribui por logra pa asina Disjonrick y Brainer yuda hopi mas persona den nos comunidad. Si cada persona na Aruba duna un florin, ta sigur cu lo por yega un cantidad grandi y asina no solamente Disjonrick, pero hopi mas hoben na Aruba cu desabilidad cu ta sinta na nan cas, cu no por sali haci un deporte y disfruta di e comunidad di Aruba, por bay logra esaki.

T’e gran soño di Brainer y Disjonrick.

Manera ya indica, e lo tuma luga dia 27 di november y lo ta full rond di Aruba.

Por para na KFC San Nicolas, na Playa y Santa Cruz, por wak nan, por apoya nan y corda tin e florin.

Tambe lo tin ambiente musical na KFC na Playa durante dia. Por yega eynan tambe, sigui nan riba red social, keda bon informa y asina logra pa no solamente Disjonrick, pero hopi mas hoben den comunidad, yega na nan soño.

E actividad aki lo cuminsa pa 12:00 pm y lo caba pa 7:00 pm.

Kentucky ta uni: Ta recauda fondo pa yuda Disjonrick

Kentucky ta uni: Ta recauda fondo pa yuda Disjonrick

Posted by 24ora on Tuesday, September 27, 2022

Half Ironman Distance

Disjonrick kier haci un Half Ironman Distance, segun Brainer, cu ta forma parti pa logra Disjonrick su soño.

E kier duna bek na comunidad tambe cu mas otro mucha por haci mas deporte tambe.

P’esey a bin e dia aki pa haci e ‘Race’, cu ta 1900 meter landamento, cu lo cuminsa na Cura Cabay Beach y caba na Sirena by the Sea, cu ta na Savaneta.

Esaki ta un challenge. P’esey tin un racer judge, cual lo ta Glennon Eights.

Tambe lo bay core 90 kilometer cu bicicleta, direccion San Nicolas. Fo’i San Nicolas lo bay CITGO Essoville.

For di eynan ta pasa dilanti na KFC San Nicolas, direccion rotonde Pos Chikito.

For di eynan ta bay direccion Drive Inn. Di eynan ta bay Santa Cruz, pasa dilanti KFC Santa Cruz.

For di e rotonde na Santa Cruz ta bay stret p’e rotonde Paradera. For di eynan ta bay direccion Paperclip Rotonde. For di eynan ta bay direccion aeropuerto. Eynan ta bay direccion rotonde Plaza America, sigui bay abao y bay te n’e rotonde banda di Guardian Group, sigui bay Arashi. Na Arashi ta haci un loop y bay bek rib’e mesun ruta, bay direccion Plaza America y for di eynan bay Sero Blanco Gasstation y caba na KFC na Playa.

For di eynan lo tin un transicion caminda lo tin diferente caminda cu lo colecta cen full e dia.

Ora cu caba tin 21 kilometer na pia, sali for di KFC na Playa, bay direccion Sero Blanco, rotonde Plaza America, for di eynan ta bay te Rotonde di Guardian Group, djey bay Phoenix, lora bay bek riba e mesun ruta pa por caba na KFC na Playa.

E meta ta pa haci e hazaña aki den 7 ora. E training ta bayendo hopi duro te asina leu, segun Brainer ta splica pero no ta hala atras  lo logr’e tambe.

Tin un team para tras di e dos atletanan aki. E ta duro, segun Brainer, pasobra ta cuminsa pa 12:00 pm.

Si abo ta kere cu bo por duna mas di un florin, ta mas cu bon bini, segun Johanna Jacobs. Lo tin liña di telefon habri p’asina por yama y contribui n’e causa aki. E idea ta pa colecta 80 mil florin. Cu un florin so, e comunidad por contribui n’e causa bunita aki dia 27 di november proximo.

Lo tin cuater fundacion cu semper a colabora cu Brainer y Disjonrick, cu lo haya nan gradicimento riba e dia aki.