Josephine Albertus (SIMAR):Aumento di costo di bida ta preocupa sindicato y comercio

Diamars mainta Sindicato di Maestro di Aruba (SIMAR) tabata un di dos sindicato cu a sinta na mesa cu Comerciantenan Uni Aruba (CUA) pa un encuentro caminda a intercambia informacion. Na salida, presidente di SIMAR, Josephine Albertus a duna un declaracion den cual a confirma e obhetivo di e reunion, a enfatisa e situacion precario di Pais Aruba y a pidi miembronan pa ta pendiente na un eventual yamado cu e sindicato por haci.

“Siman pasa CUA tabatin un rueda di prensa caminda a duna informacion riba mesun punto cu awe nos a sinta cu nan,” asina Albertus a bisa argumentando cu nos mester ta realistico y acepta cu costo di bida a subi y cu e ta algo preocupante pa nos tur.

Durante e encuentro cu e asociacion cu ta representa comerciante, a haya informacion pa asina SIMAR tambe por sigui den su esfuersonan. Albertus a admiti cu no ta semper nan lo ta riba mesun liña pasobra un ta trahado y otro ta dunado di trabou, pero cierto momento tin puntonan en comun. “Nos a sinta, nos a dialoga y despues lo wak mas leu, pero tabata pa nos por haya informacion.”

E sindicalista ta recorda cu e mandato cu a haya for di aña pasa ta cu nan kier eliminacion di 12.6% completo. Albertus: “Nos a traha riba dje, pero no a logra full. Nos a bay corte, no por a traha e ora menos. E aña aki te awo, door di presion, a logra kita e 5% y a cambio di nada pasobra si tabata pa gobierno, e kitamento di 5% lo a bay a cambio di 13 dia di ATV. Nos ta bahando, a yega 7.6%, pero costo di bida ta subi y nos miembro tur dia ta puntra kico ta e siguiente paso.”

Pa e relato completo, lesa TREMPAN