Jorien Wuite (D66): Un aanwijzing mester uz’e cu hopi cautela

Diabierna ultimo, den Conseho di Minister di Reino (Rijksministerraad), a tuma luga un reunion caminda cu a dicidi cu Aruba lo no haya aanwijzing. Esaki sigur ta un bon noticia pa Gobierno di Aruba, ya c’un posibel aanwijzing lo a haci e situacion financiero di nos pais un tiki mas dificil. Pero na Hulanda tambe e noticia aki a cay den hopi bon tera.

Nos colega Marko Espinoza, cu actualmente ta na Hulanda relaciona cu e reunion den Conseho di Minister di Reino (Rijksministerraad), despues di e reunion, tabata tin e oportunidad di intercambia algun palabra cu Jorien Wuite di e partido D66. El a bisa cu esaki ta un noticia sumamente positivo. “Un aanwijzing ta un instrumento sumamente excepcional pero tambe uno hopi pisa. Esaki ta e motibo tambe cu mester uz’e cu sumo cautela.”

Wuite a sigui bisa cu e ta wak e como un punto positivo cu Secretario di Estado, mr. Alexandra van Huffelen ta den combersacion cu Prome Minister di Aruba, mr. Evelyn Wever-Croes. Door di haci esaki e ta manten’e su mes bon informa di e temanan manera e maneho financiero di Aruba, su resiliencia y e gobernacion.

Relaciona cu esaki, conocemento di e actividadnan financiero di Aruba ta hopi importante pa nan, pa asina nan tambe por duna contenido na nan mesun agenda politico.

KEN TA JORIEN WUITE
Wuite a nace na Den Haag y a crece den e area aki. Ambos mayor a traha den e ramo di educacion y su mama, Anna Merab Richardson, escritor tambe, ta di St. Maarten. El a studia Gezondheidswetenschappen na Erasmus Universiteit Rotterdam. Despues el a haci un di dos master den Public Managemente & Policy na Open Universiteit y a studia Politica Internacional na Instituut Clingandeal.

Na 1997 el a bay biba na St. Maarten unda cu el a bira director di e Sector di Cuido na St. Maarten. Na 2008 el a bira director di Sector di Cuido, Desaroyo Social y Labor na 2008 y a keda den e funcion ey te na su nombramento como Secretario General di e Ministerio ey dos aña despues. Na 2014 el a bira politicamente activo na St. Maarten. Na 2018 el a bira Minister Plenipotenciario di St. Maarten pa cual el a bandona St. Maarten y a bay biba bek na Den Haag. Na 2020 el a bira miembro di D66 y a pone su mes eligibel pa e eleccion di Tweede Kamer na 2021. Dia 31 di maart 2021 el a huramenta como e prome miembro di Tweede Kamer c’un background di St. Maarten.

E ta miembro di e comision interparlamentario relaciona cu e Nederlandse Taalunie y e comision fiho pa Buitenlandse Handel en Ontwikkelingssamenwerking (presidente), pa Relacion di Exterior, pa Relacion di Reino y pa Educacion, Cultura y Ciencia, Nederlandse Taalunie y e comision fiho pa Buitenlandse Handel en Ontwikkelingssamenwerking (presidente), pa Relacion di Exterior, pa Relacion di Reino y pa Educacion, Cultura y Ciencia.